მიხეილ სარჯველაძე: არც არასდროს შეწყვეტილა, არც ახლაა შეწყვეტილი და არც მომავალში შეწყდება ბავშვების ინსულინით უზრუნველყოფა. ყველა მშობელმა მინდა, ეს იცოდეს

არც არასდროს შეწყვეტილა, არც ახლაა შეწყვეტილი და არც მომავალში შეწყდება ბავშვების ინსულინით უზრუნველყოფა. ყველა მშობელმა მინდა, ეს იცოდეს. კიდევ ერთხელ არც ვისაუბრებდი და არც პასუხს გავცემდი იმ ადამიანებს, რომლებიც მიზანმიმართულ სიცრუეს ავრცელებენ, რომ არა მშობლებთან მიმართებაში არსებული პასუხისმგებლობა - ნამდვილად არ მინდა, მათ ჰქონდეთ შიში იმისა, რომ მათი შვილი ინსულინის გარეშე დარჩა, - განაცხადა გადაცემაში „დღის ქრონიკა“ ჯანდაცვის მინისტრმა, მიხეილ სარჯველაძემ.

მინისტრმა აღნიშნა, რომ პრეპარატ „ნოვორაპიდთან“ დაკავშირებული შეფერხება მწარმოებელი კომპანიის მხრიდანაა გამოწვეული, თუმცა ეს პაციენტებზე არ აისახება, რადგან ქვეყანაში არსებობს მაღალი ხარისხის, ფრანგული კომპანია „სანოფის“ წარმოებული პრეპარატი, რომელიც შეუფერხებლად გაიცემა.

„სრული პასუხისმგებლობით შემიძლია ვთქვა, რომ ეს მენეჯმენტის პრობლემა არ ყოფილა. ჩვენს მიერ არაერთი გზით გავრცელებული ინფორმაციის მიუხედავად - ბრიფინგი, პირადი შეხვედრები დაინტერესებულ მხარეებთან თუ სხვა - რომ ადამიანი გამოვა და ამბობს, რომ მენეჯმენტის პრობლემა იყო, ის ან ტყუის შეგნებულად, მიკერძოების გამო, მოტივირებულია, რაღაც აჟიოტაჟი ხელოვნურად შექმნას, ან უბრალოდ, საქმეში ჩაუხედავი დილეტანტია.

საკმარისი რაოდენობით და თვეებით ადრე დაიგეგმა შესყიდვა, შეფერხება ჰქონდა კომპანია „ნოვო ნორდისკს“. ივნისის დასაწყისში უნდა მოეწოდებინა 15 000 ერთეული, მოგვაწოდა, დაახლოებით, 8000. დარჩენილი პარტია დღემდე მოწოდებული არ გახლავთ. ამ თემაზე, მათთან გვაქვს მუდმივი კომუნიკაცია. როდესაც მოწოდების ვადები გაიწელა, მე თვითონ ჩავედი კოპენჰაგენში, ძალიან მაღალ დონეზე გავმართე კომპანიის წარმომადგენლებთან შეხვედრა.

შარშან, ნოემბერში დაიწყო მუშაობა შესყიდვაზე, შემუშავდა მეთოდოლოგია, ჩატარდა ბაზრის კვლევა, თებერვალში გამოცხადდა ტენდერი, გამარჯვებულ კომპანიასთან 14 აპრილს გაფორმდა ხელშეკრულება. მოწოდება უნდა განხორციელებულიყო ივნისის დასაწყისში. აქვთ გარკვეული პრობლემები და მათმა წარმომადგენელმა აღნიშნა, რომ ეს მარტო ჩვენთან არ არის. სხვა, მათ შორის ევროპულ სახელმწიფოებთან მიმართებაშიც არის მიწოდების გარკვეული ხარვეზები, ჩამორჩენა გრაფიკში, იქ უბრალოდ სკანდალს არავინ ტეხს, იმიტომ რომ არის მეორე პროდუქტი, „სანოფის“, რომელიც ასევე არის გლობალური ლიდერი“, - განაცხადა მიხეილ სარჯველაძემ.

მინისტრმა აღნიშნა, რომ საქართველოში ორივე კომპანიის პრეპარატი გამოიყენება და პაციენტთა დიდი ნაწილი, „ნოვო ნორდისკთან“ დაკავშირებით შექმნილ ხარვეზამდეც, სწორედ „სანოფის“ პროდუქციას ანიჭებდა უპირატესობას.

„გამოდიან ადამიანები და მაძლევენ რჩევას, რომ სასწრაფოდ უზრუნველვყოთ პაციენტები ალტერნატიული პროდუქტით. თუმცა მათ გადასარევად იციან, ერთი კვირით ადრე გამოვედი და საჯაროდ ვთქვი, რომ ალტერნატიული პროდუქტი ხელმისაწვდომია, არასდროს გამქრალა და ყოველთვის იყო ბაზარზე.

რაც შეეხება მშობლებს, ჩვენ თვითონ დავუკავშირდით და მივაწოდეთ ინფორმაცია, ავუხსენით, რომ არავითარი შიშისა და პანიკის მიზეზი არ არსებობს - ქვეყანაში არის მაღალი ხარისხის, ალტერნატიული მედიკამენტი, რომელიც სულად თავისუფლადაა ხელმისაწვდომი“, - განაცხადა მიხეილ სარჯველაძემ.