შენობის გარეშე დარჩენილ სიმფონიურ ორკესტრს ქირის ხარჯებისთვის 150 ათასი ლარი გამოუყვეს

საქართველოს ეროვნული სიმფონიური ორკესტრი, რომელსაც მრავალი წელია შენობა არ აქვს, სახელმწიფოს თბილისის დიდი საკონცერტო დარბაზის გადაცემას სთხოვს.

ნიკოლოზ რაჭველი აღნიშნავს, რომ ფილარმონია სწორედ ამ ორკესტრისთვის აშენდა და მისი მოთხოვნა შენობის დაბრუნების შესახებ ლოგიკურია. ამ საკითხის განხილვის თაობაზე ორკესტრმა პრემიერს, ეკონომიკისა და მდგრადი განვითარების, ასევე განათლების, მეცნიერების, კულტურისა და სპორტის სამინისტროებს წერილით მიმართა.

საქართველოს ეროვნული სიმფონიური ორკესტრის მოთხოვნას მიხეილ გიორგაძე პასუხობს. მინისტრის მოადგილე აცხადებს, რომ შენობის გარეშე დარჩენილ ორკესტრს სხვადასხვა ფართის დასაქირავებლად 150 000 ლარი გამოეყო. მუსკომედიის თეატრის ადგილას კი, სადაც ორკესტრი რეპეტიციებს გადის, ახალი შენობის მხოლოდ სამშენებლო სამუშაოებისთვის 15 მილიონი ლარი გამოიყო, რაც ორკესტრის ხელმძღვანელმა არასაკმარის თანხად მიიჩნია.

მიხეილ გიორგაძის კომენტარს ეროვნული სიმფონიური ორკესტრი განცხადებით გამოეხმაურა. მათი თქმით, იხეილ გიორგაძემ ორკესტრის სამართლიან მოთხოვნას საკონცერტო დარბაზით უზრუნველყოფის შესახებ ნიკოლოზ რაჭველის დამცირებითა და მუქარით უპასუხა. 

"მან დღეს გაკეთებულ კომენტარში აღნიშნა, რომ ნიკოლოზ რაჭველს დაემართა გიგანტომანია და რომ შესაძლოა ორკესტრის ხელმძღვანელის პასუხისმგებლობის საკითხი დადგეს. იგი აგრეთვე, შეეცადა ციფრებით მანიპულირებას.

1. მიხეილ გიორგაძეს თბილისის საკონცერტო დარბაზი რატომღაც გიგანტური მოეჩვენა ეროვნული ორკესტრისთვის და არანაირ დისკომფორტს არ უქმნის ის ფაქტი, რომ დარბაზი წელიწადში თითქმის 300 დღე უმოქმედოდ დგას და სრულ დეგრადაციას განიცდის სფერო, რომელიც ყველა ქვეყანაში დიდი წარმატებით ვითარდება.

2. სამარცხვინოა, რომ 2014 წლიდან მოყოლებული კულტურის სამინისტროს სათავეში მდგარმა ადამიანმა ისიც კი არ იცის, თუ რა დებულებით იმართება სსიპ საქართველოს ეროვნული მუსიკალური ცენტრი, რომლის მიხედვითაც ნიკოლოზ რაჭველს ის ვერც დანიშნავს და ვერც მოხსნის, რადგან ეს კომპეტენცია მხოლოდ ეროვნულ ორკესტრს და სამხატვრო საბჭოს გააჩნია გია ყანჩელის ხელმძღვანელობით. ნიკოლოზ რაჭველი 2017 წლის 4 დეკემბერს 4 წლის ვადით ხელმეორედ იქნა არჩეული ეროვნული ორკესტრის მიერ.

3. რაც შეეხება ციფრებით მანიპულირებას, 2018 წლის აპრილში პრემიერ-მინისტრ კვირიკაშვილის მიერ მიხეილ გიორგაძეს და ცენტრის ხელმძღვანელობას დაევალა დარბაზის აშენებასთან დაკავშირებული ხარჯებისა და სხვა დეტალების მოკვლევა გამოცდილი არქიტექტორული კომპანიების ბაზაზე, საიდანაც გაირკვა, რომ სიმფონიური მუსიკისთვის განკუთვნილი დარბაზის მშენებლობა 40-45 მილიონი ევროს ინვესტირებას მოითხოვდა. 4. ჩვენ იმთავადვე მიგვაჩდა და დღესაც მიგვაჩნია, რომ ქვეყანაში, სადაც თანამედროვე სტანდარტებს ვერ პასუხობს მთავარი ფილარმონიული დარბაზი და ვერ ხდება მისი სრული დატვირთვა, მიზანშეწონილია მისი განახლება და ფილარმონიული ორკესტრის სწორედ ამ შენობაში დაბინავება და არა სახელდახელო უხარისხო საკონცერტო დარბაზის აშენება, - წერია განცხადებაში.