როგორ იშოვეს კარდაშიანებმა მილიონები

ამერიკული რეალური შოუ "კარდაშიანების ოჯახი" მე-16 სეზონს იწყებს და ისევ მოახდენს ოჯახური კინკლაობების დემონსტრირებას, ასევე პოპულარიზებას გაუწევს თავის პროდუქციას. რეალური შოუ პირველად ეთერში 12 წლის წინ გავიდა და მისი პოპულარობა ისევე სწრაფად გაიზარდა, როგორც მათი ოჯახი. ამის შესახებ BBC წერს.

კაილი ჯენერი რეალური შოუს დაწყების წინ ჯერ კიდევ 9 წლის იყო, ახლა კი 21 წლისაა და უკვე მილიარდერია. თუმცა არც ოჯახის სხვა წევრები სხედან უსაქმურად.

კიმ კარდაშიან უესტი თავისი კოსმეტიკური პროდუქციის გაყიდვის შედეგად მულტიმილიონერია, კენდალ ჯენერი ტოპმოდელია; ქლოე კარდაშიანი კი ჯინსების კომპანია Good American-ში გაყიდვების მიმართულებას ხელმძღვანელობს. ქლოეს უფროს დას კორტნი კარდაშიანს რეკლამებში იღებენ და სხვადასხვა ბრენდთან თანამშრომლობს. 

დებს სოციალურ ქსელში ჯამში 537 მილიონი გამომწერი ჰყავთ და მათ იციან, როგორ იშოვონ ამით ფული. ანალიტიკოსების თქმით, როგორც კი "კარდაშიანების ოჯახის" შოუში ქლოე კარდაშიანის ახალი სასიყვარულო კავშირების შესახებ ჩნდება ინფორმაცია, Jordy Lip Kit-ის კოსმეტიკური კომპლექტი (ტუჩსაცხი და კონტური) 50%-იანი ფასდაკლებით იყიდება, კომპანიას კი კაილი და ჯორდინი ფლობენ.

ანალიტიკოსების თქმით, კარდაშიანების მთელი ცხოვრება საჯაროა, მაყურებელი კი თავისი ყოველდღიურობის მასთან ასოცირებას ახდენს. 

ტელეშოუს პირველი ეპიზოდის ბოლო ნაწილში ქლოე კარდაშიანი თავისი კომპანიის ჯინსების დემონსტრირებას ახდენს, კიმი და კაილი კი სუნამოების წარმოებაში თანამშრომლობის საკითხებს განიხილავენ, კიმ კარდაშიანის ქმარი, კანიე უესტი სამომავლო გეგმებზე საუბრობს. 

ამის პარალელურად კორტნი კარდაშიანი საკუთარ ბლოგს "Poosh"-ს ქმნის, სადაც ქალის სხეული სრული სილამაზით არის წარმოდგენილი. ბლოგის გაშვება Instagram-ზე დაანონსდა, როგორც ეს კარდაშიანების ოჯახშია მიღებული. სოციალურ ქსელში განაცხადა ასევე ქლოემ, რომ ჯინსების წარმოებას იწყებს; Instagram-ი "დაეხმარა" ასევე კაილის, რომ მისი კოსმეტიკური კომპანია წარმატებით ამუშავებულიყო.

სპეციალისტების თქმით, მათ კარგად იციან, თუ როგორ უნდა დააკავშირო "ფოლოუერების" რიცხვი ბრენდის განვითარებასთან, იციან რა სურთ მათ გამომწერებს. ფოლოუერების ენას კი განსაკუთრებით კარგად კაილი ჯენერი ფლობს. 

როდესაც კაილიმ თავისი კოსმეტიკის გამოშვება დაიწყო, ის პირდაპირ მიმართავდა მილიონობით მომხმარებელს, რითაც რეკლამაში მილიონობით დოლარი დაზოგა. გამომწერების რეაქციის მიხედვით, კაილი სწრაფადვე ხვდება რა მოსწონს მათ და რა არა.