დიდ ბრიტანეთში ახალგაზრდულ ბანდებზე გადაღებულ ფილმს მასობრივი არეულობა მოჰყვა

დიდი ბრიტანეთის კინოთეატრების სიდიდით მესამე ქსელმა Vue Cinemas ჩვენებიდან მოხსნა ლონდონის ახალგაზრდულ ბანდებზე გადაღებული ფილმი „სევდიანი ისტორია“. ქსელის განმარტებით, ეს მას შემდეგ მოხდა, რაც ჩვენების დროს დღე-ღამის განმავლობაში ფილმმა „სერიოზული ინციდენტების“ რაოდენობით რეკორდი მოხსნა, ხოლო სეანსის წინ ბირმინგემში მასობრივი ჩხუბი ატყდა, რომელშიც 100 ადამიანი მონაწილეობდა. Vue Cinemas-მა განაცხადა, რომ „სევდიანი ისტორიის“ გაქირავებაზე უარი თავად ფილმს არ უკავშირდება, თუმცა კომპანია რასიზმში მაინც დაადანაშაულეს. სხვა ქსელმა, რომელიც ასევე შეეცადა ფილმის გაქირავებიდან ამოღებას, სწრაფად დააბრუნა ის ეკრანზე.

კრიმინალური დრამა „სევდიანი ისტორია“ (Blue Story) სკოლის მეგობრების - ტიმის და მარკოს შესახებ გვიამბობს, რომლებიც ლონდონის ორი რაიონის ახალგაზრდული ბანდების ომების გამო, მტრები ხდებიან. სცენარის ავტორი და ფილმის რეჟისორი რეპერი Rapman-ია (ნამდვილი სახელი ენსდრიუ ონვუბოლუ), რომელიც თავად ამ ერთ-ერთ რაიონში გაიზარდა. 2018 წელს მან გადაიღო სამსერიანი მუსიკალური მინი-სერიალი ლონდონის ბანდებზე „შიროს ისტორია“, რომელმაც YouTube-ზე დაახლოებით 20 მილიონამდე ნახვა მოაგროვა. „შიროს ისტორიის“ წარმატების შემდეგ სტუდიებმა BBC Films და Paramount ონვუბოლუს სერიალის სრულმეტრაჟიანი ვერსიის გადაღება შესთავაზეს.

კრიტიკოსებმა ფილმი დადებითად შეაფასეს. The Sun-მა კი „სევდიან ისტორიას“ „ბოლო წლების ერთ-ერთი ყველაზე ემოციური ბრიტანული ფილმი“ უწოდა. ძალადობის და სექსის სცენების გამო ფილმს ასაკობრივი რეიტინგი - 15 მიანიჭეს.

„სევდიანი ისტორია“ ბრიტანულ კინოგაქირავებაში 22 ნოემბრიდანაა. მეორე დღეს ბირმინგემში, კინოთეატრთან Vue, გასართობ ცენტრში StarCity არეულობა მოხდა, რომელშიც 100 ახალგაზრდა მონაწილეობდა. თვითმხილველების თქმით, ყველაფერი მოზარდი გოგოების ჩხუბით დაიწყო. როდესაც StarCity-ში პოლიცია მივიდა, უკვე რამდენიმე ჩხუბი გაჩაღდა. პოლიციელები ახალგაზრდების დაშლას შეეცადნენ, მაგრამ წინააღმდეგობა შეხვდათ და ელექტროშოკერების გამოყენება მოუხდათ. 7 პოლიციელმა მსუბუქი ტრავმები მიიღო.

ინციდენტის გამო StarCity-დან სტუმრების ევაკუაცია მოხდა. 13-14 წლის ბიჭები და გოგოები პოლიციელებზე თავდასხმის ბრალდებით დააკავეს (მოგვიანებით ისინი გირაოთი გაათავისუფლეს). შემთხვევის დაგილზე დანა და ორი მაჩეტე იპოვეს.

24 ნოემბერს Vue Cinemas-მა (91 კინოთეატრმა დიდ ბრიტანეთსა და ირლანდიაში) უარი თქვა „სევდიანი ისტორიის ჩვენებაზე. კომპანიის წარმომადგენელმა განაცხადა, რომ ფილმი მათ 60 კინოთეატრში აჩვენეს და პირველი 24 საათის განმავლობაში მის გამო 25-ზე მეტი სერიოზული ინციდენტი მოხდა. გადაწყვეტილება მაყურებლების უსაფრთხოების დაცვის მიზნით მივიღეთ, - დასძინა მან.

სტუდიებმა Paramount Pictures-მა და BBC Films-მა ბირმინგემის ინციდენტის გამო წუხილი გამოთქვეს და აღნიშნეს, რომ „სევდიანი ისტორია“ სწორედ ძალადობის უაზრობის დემონსტრირებაა და მან მაყურებლებისგან პოზიტიური გამოხმაურება, ხოლო კრიტიკოსებისგან - ფანტასტიკური შეფასებები მიიღო.

ფილმის რეჟისორმა კი აღნიშნა, რომ „სევდიანი ისტორია“ სიყვარულზეა და არა ძალადობაზე და იმედი გამოთქვა, რომ ბირმინგემში მომხდარის გამო პასუხისმგებლობას არა ფილმს, არამედ კონკრეტულ ადამიანებს დააკისრებენ.