ელისო ბოლქვაძე: მხარს დავუჭერ „ქართულ ოცნებას“ - პარტიას, რომელმაც ჰუმანიზმი ნორმად აქცია

ცნობილი პიანისტი ელისო ბოლქვაძე საქართველოში საპარლამნეტო არჩევნებში მხარს კვლავ „ქართულ ოცნებას“ დაუჭერს. ამის შესახებ მუსიკოსმა Facebook-ზე გამოქვეყნებულ გზავნილში განაცხადა. მან ყურადღება „ოცნების“ და პირადად ბიძინა ივანიშვილის მიერ განხორციელებულ პროექტებზე გაამახვილა და აღნიშნა, რომ სწორედ ამ ხელისუფლების დროს საქართველოში განვითარება და ჰუმანურობა ნორმად იქცა.

„საქართველოსთვის უკვე 7 წელია ნორმად იქცა საყოველთაო ჯანდაცვა, უფასო გადაუდებელი ოპერაციები, C ჰეპატიტის უფასო მკურნალობა.ვინც არ იცით, გაცნობებთ, რომ C ჰეპატიტის მკურნალობაში საქართველოს სანიმუშო ქვეყნის საპატიო წოდება მიენიჭა. სხვადასხვა საერთაშორისო რეიტინგებში საქართველოს წარმატებული აღმასვლაც უკვე ნორმად იქცა და ქართული საზოგადოება უნდა ამაყობდეს ამ მიღწევებით!

მიზანდასახული და ურყევი განვითარება, მშვიდობა, ბიზნესის, მედიის და სიტყვის თავისუფლება ქართული სახელმწიფოს ისეთივე ბუნებრივ ატრიბუტებად იქცა როგორც გერბი და დროშა. ქვეყანა კი ვითარდება ზედმეტი ეპატაჟის, პათეტიკის და ბაქიაობის გარეშე !!სააკაშვილმა თავისი მმართველობის დროს თვითრეკლამა არნახულ მწვერვალებზე აიყვანა და ლამის კომედიად აქცია. უკვე სასაცილო იყო მის მიერ ერთი და იგივე ობიექტების რამოდენიმეჯერ ზარ-ზეიმით გახსნა. ასევე გაუაზრებელი იდეოლოგიების დანერგვა საზოგადოებაში მედიის ზეწოლით.!“ - წერს ბოლქვაძე.

მისი თქმით, ქვეყნის განვითარებას ფონდ „ქართუს“ ქველმოქმედება მნიშვნელოვნად უწყობს ხელს.

„როგორც ხელოვანმა, არ შემიძლია არ ავღნიშნო ფონდი „ქართუს“ უდიდესი წვლილი ისტორიული ძეგლების გადარჩენაში. ერთი წამით წარმოიდგინეთ რამდენი რამ არ შემორჩებოდა საქართველოს, რომ არა „ქართუ“!! მაგრამ საქართველოს გაუმართლა და დღეს ბატონი ბიძინას წყალობით მივიღეთ რეაბილიტირებული თეატრები, ბოტანიკური ბაღები,„ციცინათელაც“, ბლექსი არენა, დელფინარიუმიც და მალე დენდროლიგიური უნიკალური პარკი, რომელიც ოაზისად მოგვევლინება. გავიხსენოთ ასევე აღდგენილი ისტორიულო მემკვიდრეობა, ხევსურეთში მდებარე მუცოს ციხესიმაგრე, ასობოთ სხვა ეროვნული ძეგლი, რომლითაც ვამაყობთ, თუმცა აღარ გვახსოვს, თუ ვინ გადაარჩინა ეს საგანძური...და ესეც კარგია! დიახ, სწორედაც რომ ნორმად უნდა იქცეს განვითარებაც, პროგრესიც და წინსვლაც! განვითარებას არ სჭირდება ყოველდღიური აპლოდისმენტები“, - წერს პიანისტი.

სწორედ ამ მიღწევებით არის განპირობებული ის, რომ მომავალ საპარლამენტო არჩევნებზე მუსიკოსი მხარს კვლავ მმართველ გუნდს დაუჭერს.

„მეც ჩვეულებრივი ადამიანი ვარ, რომელიც ვიღწვი განვვითარდე ყოველდღე. როცა რამეს ვაღწევ, მინდა კიდევ მეტი მოტივაციით წინ წავიდე. ჩემი ქვეყნისთვის მსურს უამრავი მიღწევა მომავალშიც იქცეს ნორმად და ამიტომ კვლავ მხარს დავუჭერ „ქართულ ოცნებას“ - პარტიას, რომელმაც ჰუმანიზმი ნორმად აქცია!!“ - წერს ბოლქვაძე.