გერმანიაში მსოფლიოს ყველაზე ნელ მუსიკალურ ნაწარმოებს უკვე 19 წელია ასრულებენ

ავანგარდიზმის მიმდევარი კომპოზიტორის, ჯონ კეიჯის ნაწარმოების შესრულებისას, აკორდი 7 წლის განმავლობაში პირველად შეიცვალა. ამის შესახებ BBC წერს.

გამოცემის ინფორმაციით, ოპუსს „რაც შეიძლება ნელა“ გერმანიაში, ხალბერშტატის ტაძარში, სპეციალურად ამ პროექტისთვის შექმნილ ორგანზე ასრულებენ. პროექტის ავტორებმა კომპოზიტორის ნების აღსრულება გადაწყვიტეს და ნაწარმოების შესრულებას 639 წლის განმავლობაში გეგმავენ. „კონცერტი“ 2001 წელს დაიწყო. პირველი, რაც პუბლიკამ „მოისმინა“ სიჩუმე იყო, რომელიც თითქმის 1,5 წელი გრძელდებოდა.

პიესის პირველი აკორდი 2 წელიწადზე მეტხანს ჟღერდა, მას შემდეგ კი 5 სექტემბრის ჩათვლით, აკორდები 11-ჯერ შეიცვალა.

„ბგერა, რომელიც 2013 წლის 5 ოქტომბრიდან 2020 წლის 5 სექტემბრამდე ჟღერდა, ისტორიის განმავლობაში ყველაზე ხანგრძლივი უწყვეტი ჟღერადობაა“, - განაცხადა პროექტის ერთ-ერთმა ორგანიზატორმა რაინერ ნოიგებაუერმა.

„რაც შეიძლება ნელა-ს“ ნოტები 8 გვერდზეა დაწერილი. ეს მუსიკის ისტორიაში ყველაზე ნელი და ხანგრძლივი ნაწარმოებია აკორდის შემდეგი შეცვლის ლოდინის კეიჯის თაყვანისმცემლებს 2022 წლის 5 თებერვლამდე მოუწევთ. პიესის შესრულება კი 2640 წელს დასრულდება.

1992 წელს გარდაცვლილმა კეიჯა პიესა 1980 წელს დაწერა. კომპოზიტორის ყველაზე ცნობილი ნაწარმოებია „4'33“. 1952 წელს შემქნილი კომპოზიცია ინსტრუმენტების ნებისმიერ კომბინაციაზე გათვლილი, თუმცა მუსიკოსები 4 წუთისა და 33 წამის განმავლობაში ერთ ნოტსაც არ ასრულებენ. მსმენელი მუსიკის ნაცვლად სიჩუმეს უსმენს.