ისრაელის საელჩოს მხარდაჭერით, ელჩის რეზიდენციაში მარჯანიშვილის თეატრის სპექტაკლის, „ბათელის“ პრემიერა გაიმართა

ისრაელის საელჩოს მხარდაჭერით, ელჩის რეზიდენციაში მარჯანიშვილის თეატრის სპექტაკლის, „ბათელის“ პრემიერა გაიმართა. პიესის ავტორია ანა სანაია, ხოლო დამდგმელი რეჟისორი - ანუკი ხიდეშელი.

„სპექტაკლი დაფუძნებულია რეალურ ისტორიებზე და მოგვითხრობს ქართველი ებრაელი ქალის შთამბეჭდავ ისტორიას. წარმოდგენას „ბათელის“ პერსონაჟის რეალური გმირი, დალი დათიკაშვილი ესწრებოდა. სწორედ მისმა ისტორიამ მისცა მთავარი იმპულსი ანა სანაიას, რომ დაეწერა ეს პიესა და გადმოეცა ის ტრადიციები და ემოციები, რაც ჩვენი ორივე ხალხისთვის ასე ახლო და ძვირფასია. შთამბეჭდავი დადგმისა და მსახიობების წყალობით, ამ სპექტაკლში ორიგინალურად და ბუნებრივად იყო გადმოცემული ის კულტურული გარემო და თვითმყოფადობა, რაც სწორედ ქართულ-ებრაული ოჯახებისთვის არის დამახასიათებელი“, - აცხადებენ საელჩოში.

ისრაელის ელჩმა, რან გიდორმა აღნიშნა, რომ წარმოდგენაში აღწერილმა პერსონაჟებმა საკუთარი თავი და ოჯახის წევრები გაახსენა. მისივე განცხადებით, მოხიბლულია მარჯანიშვილის თეატრის ახალგაზრდა მსახიობთა შესრულებით და აღნიშნავს, რომ ეს სპექტაკლი ყველამ უნდა ნახოს.

შესაბამისი რეგულაციებისა და შეზღუდვების მოხსნის შემდეგ, სპექტაკლი ცხოვრებას მარჯანიშვილის თეატრის სცენაზე გააგრძელებს.