თეა წულუკიანი: გელათის სახურავის დიდი ნაწილი მთლიანად მოსახსნელია, ეს ნიშნავს დიდი თანხების მობილიზებასა და იმ საქმის თავიდან დაწყებას, რომელიც ერთხელ უკვე გაკეთდა

გელათის რესტავრაცია ურთულესი პრობლემაა, რადგან ეს პროცესი 2008 წლიდან დაიწყო და ზოგჯერ დაუდევრობითა და ზოგჯერ პროფესიონალიზმის ნაკლებობით, ზოგჯერ მონიტორინგის ნაკლებობით პრობლემების კასკადია. ამიტომ დღეს, ძალიან რთულია ჯადოსნური ჯოხი დაიქნიო და პრობლემები უცებ მოაგვარო, - ამის შესახებ კულტურის, სპორტის და ახალგაზრდობის მინისტრმა, თეა წულუკიანმა „იმედის დილაში“ განაცხადა.

„არქიტექტორ-რესტავრატორთა ჯგუფის მოსაზრებით, რომლებიც ამ საქმის პროფესიონალები არიან და არაერთი ძეგლი გადაურჩენიათ, გელათის სახურავის 800 კვადრატული/მეტრი ფართი მთლიანად მოსახსნელია. ამას ეთანხმება ძეგლთა დაცვის სააგენტო, რომელიც ამ ძეგლის რესტავრაციას კურირებს, ასევე მათ ეთანხმება მუნიციპალური განვითარების ფონდი, რომელიც სამუშაოების მეორე ეტაპს კურირებს. ესაა მოსაზრება, რომელსაც ყველა ეთანხმება, როცა ამ სფეროში კონსენსუსის მიღწევა რთულია. ეს ნიშნავს დიდი თანხების მობილიზების საჭიროებას და იმ საქმის თავიდან გაკეთებას, რომელიც ერთხელ უკვე გაკეთდა“, - განაცხადა წულუკიანმა.

ამასთან, მინისტრმა განმარტა, რომ ამ პროცესში უცხოელი ექსპერტებიც ჩაერთვებიან. „ჩვენ უკვე მივმართეთ იუნესკოს, რადგან გელათი ამ სიაშია. პანდემია უშლის ხელს იუნესკოსაც, რომ უფრო სწრაფად იმუშაოს და ჩემი ვარაუდით, ერთ თვეში უნდა ვიცოდეთ იმ ექსპერტების ვინაობა, ვინც გელათის საკითხში დაგვეხმარება“, - განაცხადა წულუკიანმა.

თეა წულუკიანი მინისტრად პრემიერ-მინისტრის ბრძანების შესაბამისად დაინიშნა. მის დანიშვნას ირაკლი ღარიბაშვილმა ხელი 19 მარტს მოაწერა.