სვანეთი საერთაშორისო ფილმების ფესტივალს მასპინძლობს

მესტიაში, სვანეთის პირველი საერთაშორისო ფილმების ფესტივალი ტარდება. კინოფესტივალის დამფუძნებლები არიან რეჟისორი მარიამ ხაჭვანი და თეიმურაზ ჩხვიმიანი.

ღონისძიება მასპინძლობს სამოცამდე კინოხელოვანს, წარმატებულ კინემატოგრაფისტებსა და დამწყებ რეჟისორებს. ფესტივალის პირველ წელს მოკლემეტრაჟიანი ფილმების საერთაშორისო კონკურსს წარადგენენ, სადაც ოცი მოკლემეტრაჟიანი ფილმი მონაწილეობს.

საერთაშორისო მოკლემეტრაჟიანი კონკურსის ჟიურის წევრები არიან: ჟიურის თავჯდომარე – Paolo Bertolin, ვენეციისა და ლოკარნოს საერთაშორისო კინოფესტივალების სელექტორი, რეჟისორები ლევან კოღუაშვილი და ანა ურუშაძე.

საუკეთესო მოკლემეტრაჟიან ფილმს გადაეცემა ქალღმერთი დალის პრიზი. ასევე, ჟიური გამოავლენს საუკეთესო ოპერატორისა და საუკეთესო რეჟისორის ფილმებსაც.

ფესტივალის ფარგლებში, იქნება 11 სრულმეტრაჟიანი მხატვრული ფილმის პროექტის პრეზენტაცია და გაიმართება ტრენინგები, რომელთაც პროდიუსერი ვლადიმერ კაჭარავა ჩაატარებს.

გამარჯვებულ პროექტებს საქართველოს კულტურის, სპორტისა და ახალგაზრდობის სამინისტროს ხელშეწყობით გადაეცემათ ფულადი ჯილდოები:

პირველი ადგილი – 5 000 ლარი;

მეორე ადგილი 4 000 ლარი;

მესამე ადგილი 4 000 ლარი.

ჟიურის წევრები არიან რეჟისორები რუსუდან ჭყონია და გიორგი ოვაშვილი.

კინოფესტივალზე მასტერკლასებს ჩაატარებენ: პროდიუსერი ვლადიმერ კაჭარავა, რეჟისორი გიორგი ოვაშვილი, პროდიუსერი ქეთი დანელია და მონტაჟის რეჟისორი ლევან კუხაშვილი. ონლაინ რეჟიმში გაიმართება Paolo Bertolin-ისა და Christophe Leparc-ის მასტერკლასებიც.

ფესტივალი 3 ოქტომბერს დაიწყო და 7 ოქტომბერს დასრულდება.