ოპრა უინფრი ვაინშტეინთან ინტერვიუსთვის მზადყოფნას გამოთქვამს

ამერიკელი მსახიობი და ტელეწამყვანი ოპრა უინფრი სკანდალურ პროდუსერთან, რომელსაც ათობით ქალი სექსუალურ შევიწროებაში ადანაშაულებს, ჰარვი ვაინშტეინთან ინტერვიუზე მზადყოფნას გამოთქვამს. ამასთან, ოპრა უარყოფს გავრცელებულ ინფორმაციას იმის შესახებ, რომ მას სახალხოდ მხარს დაუჭერს. ინფორმაციას TMZ-ი ავრცელებს.

“ოპრას ჰარვი ვაინშტეინთან პირადად არ უსაუბრია. პროდუსერის რომელიღაც წარმომადგენელი დაუკავშირდა მას იმის გასაგებად, თანახმა იქნებოდა თუ არა ინტერვიუზე. ოპრამ თანხმობა განაცხადა, მაგრამ მხოლოდ ინტერვიუზე. ამ ეტაპზე კონკრეტული რაიმე გეგმა არ არსებობს“, - განმარტავს უინფრის წარმომადგენელი. ამასთან, მან ისიც განაცხადა, რომ ტელეწამყვანი ინტერვიუს ერთადერთ შემთხვევაში ჩამოართმევს, თუ ვაინშტეინი გულახდილი იქნება.

თავად ვაინშტეინმა კი უკვე არაერთხელ განაცხადა, რომ მას უინფრიმ დაურეკა და მხარდაჭერას შეჰპირდა იმ შემთხვევაში, თუ ის საჯაროდ გამოვიდოდა ეთერში მის გარშემო აგორებულ სკანდალთან დაკავშირებით. 

სტატიები იმის შესახებ, რომ ჰოლივუდის ცნობილი პროდიუსერი ჰარვი ვაინშტეინი წლების განმავლობაში ბოროტად იყენებდა თავის მდგომარეობას და ახალგაზრდა მსახიობ ქალებს სექსუალური ხასიათის ქმედებებისკენ უბიძგებდა, თითქმის ერთდროულად გამოაქვეყნა ორმა წამყვანმა ამერიკულმა გამოცემამ - The New York Times-მა და The New Yorker-მა. ვაინშტეინის მხრიდან სექსუალური შევიწროების შესახებ განაცხადეს ცნობილმა მსახიობებმა, მათ შორის გვინეტ პელტროუმ და ანჯელინა ჯოლიმ. პროდიუსერი ჯერ საკუთარი კომპანიიდან გააძევეს, შემდეგ ის ცოლმა მიატოვა, რამდენიმე დღის წინ კი ამერიკულმა და ბრიტანულმა პოლიციამ მის წინააღმდეგ გამოძიება დაიწყეს.

ვრცლად ჰოლივუდის სექს-სკანდალის შესახებ ინფორმაცია შეგიძლიათ წაიკითხოთ ბმულზე.