Check in Georgia-ს ფარგლებში საქართველოში საერთაშორისო დონის ვარკვლავების კონცერტები იგეგმება

სახელმწიფოს მხარდაჭერით პროექტი Check in Georgia უკვე მესამედ ჩატარდება. ეკონომიკის სამინისტროს ინფორმაციით, პროექტის ფარგლებში 2018 წელს დაგეგმილია მნიშვნელოვანი მუსიკალური და სხვა სახის შემეცნებით-გასართობი აქტივობები მთელი საქართველოს მასშტაბით.

Check in Georgia 2018-ის ფარგლებში საქართველოში კონცერტებს გამართავენ საერთაშორისო რანგის ვარსკვლავები. სამინისტროს ცნობით, მათი კონცერტების შესახებ ინფორმაცია უახლოეს დღეებში გავრცელდება.

წელს Check in Georgia-ს ბიუჯეტი 20 მილიონ ლარს შეადგენს. ამ თანხის მნიშვნელოვანი ნაწილი დაიხარჯება იმ ღონისძიებებზე, რომლებშიც ქართველი შემსრულებლები მიიღებენ მონაწილეობას.

სამინისტროს ცნობით, ქართველი, მათ შორის დამწყები შემსრულებლები პროექტში მონაწილეობას მიიღებენ მინიმალური დანახარჯებით, რაც მათთვის მნიშვნელოვანი შემოქმედებითი სტიმული და შესაძლებლობაა.

Check in Georgia წელს აუდიტორიას საინტერესო და მრავალფეროვან პროგრამას შესთავაზებს - საქართველოს რამდენიმე რეგიონში კონცერტებს გამართავენ ანსამბლები: „სუხიშვილები“, „ერისიონი“ და „რუსთავი“, ასევე თბილისის კამერული ორკესტრი.

პროექტის ფარგლებში ჩატარდება საბალეტო ფესტივალი თბილისში, ელექტრონული მუსიკის ფესტივალი 4GB საგურამოში, ელექტრონული მუსიკა ანაკლიაში, მუსიკის ფესტივალი „ოფენ ეარ“, „არტარეას“ ეზოს ფესტივალი და ა.შ.

იტალიის საელჩოსთან შეთანხმებით 2018 წელს ასევე დაგეგმილია სამი უმნიშვნელოვანესი გამოფენა, კერძოდ: „აღორძინების ეპოქის გრაფიკა“ – ტურინის სამეფო მუზეუმის კუთვნილი 50-მდე გრაფიკული დიზაინის მქონე ნამუშევრის გამოფენა; „ტიციანი, ფერთა დიდოსტატი“ და „ბერნინი და რომაული ბაროკო“ – XVII საუკუნის 50 მნიშვნელოვანი ნამუშევრის გამოფენა.