ეკონომიკის სამინისტროს ცნობით, Gem Fest-ის მიერ გავრცელებულ ინფორმაციაში უზუსტობაა

GEM FEST-ის დამფუძნებლის, გიორგი სიგუას განცხადებას ეკონომიკისა და მდგრადი განვითარების სამინისტრო ეხმაურება, რომელიც აცხადებს, რომ ფესტივალის ორგანიზატორების მიერ დღეს გავრცელებულ ინფორმაციაში შეცდომაა, რადგან სახელმწიფო არ აპირებს GEM FES-ის ორგანიზატორებისთვის განმუხურსა და ანაკლიაში მიწის იჯარით გადაცემას, ვინაიდან მოთხოვნილ ტერიტორიაზე უკვე სხვა ღონისძიებებია დაგეგმილი. 

სამინისტროს ინფორმაციით, უწყების სსიპ სახელმწიფო ქონების ეროვნულ სააგენტოს განცხადებით მიმართა შპს „ჯი ემ ეფ“ის გენერალურმა დირექტორმა დავით დამენიამ და მოითხოვა მათ მიერ ანაკლია-განმუხურის ტურისტულ ზონაში უკვე დაგეგმილი ელექტრონული მუსიკის ფესტივალის „GEM FEST 2018”-ის ჩასატარებლად სახელმწიფოს საკუთრებაში არსებული მიწის ნაკვეთების იჯარის უფლებით გადაცემა. კომპანია თავის წერილში ასევე აღნიშნავდა, რომ ფესტივალის ჩატარებას 9 აგვისტოდან 12 აგვისტოს ჩათვლით გეგმავდნენ და ბილეთების დიდი ნაწილი უკვე გაყიდული იყო.

„გვინდა აღვნიშნოთ, რომ ჩვენთვის აბსოლუტურად გაუგებარია ქონების მესაკუთრის თანხმობის გარეშე ელექტრონული ფესტივალის ორგანიზატორების მხრიდან ბილეთების რეალიზაციის პროცესი და მიგვაჩნია, რომ ეს  ფაქტი გამოიწვევს ქართველი და უცხოელი მომხმარებლის შეცდომაში შეყვანას“, - აცხადებენ სამინისტროში.

ეკონომიკის სამინისტროს ინფორმაციით, რაც შეეხება ანაკლია-განმუხურის ტურისტულ ზონაში არსებულ სახელმწიფო ქონებაზე დაგეგმილ ღონისძიებებს, მიმდინარე წელს სახელმწიფო პროექტის „Check in Georgia”-ს ფარგლებში, გარდამავალი პერიოდის განმავლობაში, ტერიტორიაზე დაგეგმილია რამოდენიმე მუსიკალური აქტივობა, მათ შორის ერთი ხანგრძლივი - 4 დღიანი ღონისძიება. ტერიტორიაზე ასევე დაგეგმილია ინოვაციების და სტარტაპ ეკოსისტემის ხელშემწყობი ღონისძიებების ჩატარება, რომელსაც ინოვაციებისა და ტექნოლოგიების სააგენტო უზრუნველყოფს.

დღეს გავრცელდა ინფორმაცია, რომ ელექტრონული ფესტივალი GEM FEST-ი 9-12 აგვისტოს ჩატარდება.