ვენეციის ბიენალეზე საქართველოს სახელით წარსადგენ პროექტს კონკურსით შეარჩევენ

საქართველოს განათლების, მეცნიერების, კულტურისა და სპორტის სამინისტროს ინიცირებით და მხარდაჭერით, სსიპ „შემოქმედებითი საქართველო“ აცხადებს კონკურსს ვენეციის 58-ე ხელოვნების საერთაშორისო გამოფენაზე საქართველოს სახელით წარსადგენი პროექტის შესარჩევად.

ვენეციის საერთაშორისო ხელოვნების ბიენალე, თანამედროვე ხელოვნების ყველაზე მასშტაბური და პრესტიჟული გამოფენაა, რომელიც 1895 წელს დაარსდა და უკვე 120 წელზე მეტს ითვლის. რიგით, 58-ე ხელოვნების საერთაშორისო გამოფენა, 2019 წლის 11 მაისიდან 24 ნოემბრამდე იტალიაში, ქალაქ ვენეციაში გაიმართება.

2019 წლის გამოფენის მთავარი თემაა “გეცხოვროთ საინტერესო დროს” (May You Live in Interesting Times). კურატორი - რალფ რუგოფი (Ralph Rugoff).

“გეცხოვროთ საინტერესო დროს”(May You Live in Interesting Times), ხელოვანთა იმ ნამუშევრებს გააერთიანებს, რომლებიც დამთვალიერებელს ობიექტებისა და გამოსახულებების, ჟესტებისა და სიტუაციების ახლებური გააზრების საშუალებას მისცემს.

საქართველოს ეროვნული პავილიონისთვის 74 კვ. მ ფართობის სივრცე ვენეციის ერთ-ერთ მთავარ საგამოფენო სივრცეში - „არსენალეზეა“ გამოყოფილი; თანხა გამარჯვებული პროექტისათვის შეადგენს 160 000 ლარს.

კონკურსზე განაცხადების მიღება 26 ოქტომბერს, 17:00 საათზე დასრულდება. საკონკურსო კომისია გამარჯვებულ და სარეზერვო პროექტებს, მაქსიმუმ, 10 სამუშაო დღის ვადაში გამოავლენს. განაცხადები მიიღება შემდეგ ელექტრონულ მისამართზე:

დეტალური ინფორმაცია, საკონკურსო პირობებისა და შერჩევის წესის შესახებ იხილეთ ბმულზე:

დამატებითი ინფორმაციისათვის ეწვიეთ სსიპ „შემოქმედებითი საქართველოს“ ვებგვერდს.