აზია არჯენტომ არასრულწლოვან ჯიმი ბენეტთან სექსი აღიარა

იტალიელმა მსახიობმა აზია არჯენტომ მსახიობ ჯიმი ბენეტთან სექსუალური კავშირი აღიარა, თუმცა მისი თქმით  მათ შორის მომხდარი აქტი ძალადობრივი არ იყო. ამის შესახებ არჯენტომ იტალიური ტელეარხის La7-ის ეთერში თქვა. 

არჯენტო და ბენეტი ერთმანეთს სასტუმროში შეხვდნენ და ქალი მას ფილმში გადაღებას შეჰპირდა. არჯენტოს თქმით, ამის შემდეგ მას ბენეტი ჩაეხუტა და კოცნა დაუწყო. „ის ფაქტობრივად შემახტა, გამხადა, დამაწვინა საწოლზე და სექსით დაკავდა. მას პრეზერვატივიც არ გამოუყენებია. მე არ ვინძრეოდი. სექსის შემდეგ, მან მითხრა, რომ ჩემს მიმართ ლტოლვას 12 წლიდან განიცდიდა“, - ამბობს აზია არჯენტო. 

არჯენტოს თქმით, მან არ იცოდა რომ იმ მომენტში ბენეტი ჯერ კიდევ არ იყო 18 წლის. 

აზია არჯენტო კინოს ბიზნესში ერთ-ერთი პირველი იყო, ვინც პროდიუსერი ჰარვი ვაინშტეინი სექსუალურ ძალადობაში დაადანაშაულა. 

2017 წელს, კანის 71-ე კინოფესტივალზე სიტყვით გამოსვლისას მან თქვა, რომ 1997 წელს ვაინშტეინმა გააუპატიურა. არჯენტო მოძრაობა #MeToo-ს ერთ-ერთი ლიდერი გახდა. ამ აღიარებიდან რამდენიმე თვეში კი სექსუალურ შევიწროებაზე დუმილის სანაცვლოდ მსახიობ ჯიმი ბენეტს ფული გადაუხადა.

ჯიმი ბენეტის მტკიცებით, ის ჯერ 17 წლის არ იყო, როდესაც კალიფორნიაში, სასტუმრო Ritz-Carlton-ში მაშინ 37 წლის არჯენტომ (ახლა ის 42 წლისაა) მასზე სექსუალურად იძალადა.

კალიფორნიაში სექსუალური შეთანხმების ასაკი 18 წელია. ამის შესახებ ინფორმაცია ამერიკულმა The New York Times-მა გამოაქვეყნა. გამოცემის ცნობით, მათ არჯენტოს „ბრალის“ დამადასტურებელი დოკუმენტები მოიპოვეს, მათ შორის ფოტოც, რომელთა ავთენტურობაც საქმესთან დაკავშირებულმა სამმა ადამიანმა დაადასტურა.

მსახიობმა ბრალდება უარყო, რის შემდეგაც მას ფოტოს სახით კომპრომატი გამოუქვეყნეს.