ფრანკფურტის წიგნის ბაზრობის ფარგლებში ქართული ექსპოზიციები 70 000-ზე მეტმა ვიზიტორმა იხილა

ფრანკფურტის საერთაშორისო წიგნის ბაზრობის საპატიო სტუმრის პროგრამის ფარგლებში, საქართველოს ეროვნული მუზეუმის ექსპოზიციები 70.000-ზე მეტმა ვიზიტორმა იხილა.

ათასობით დამთვალიერებლის წინაშე გაცოცხლდა ისტორიები საქართველოზე, როგორც პირველი ევროპელების სამშობლოზე, ღვინის უძველესი წარმოების ტრადიციაზე, მედეას სიყვარულსა და ოქროს საწმისზე.    

„ოქრო და ღვინო - საქართველოს უძველესი საგანძური“, „მედეას სიყვარული და ბრძოლა ოქროს საწმისის მოსაპოვებლად", „Homo georgicus - თავის ქალა პირველი ევროპელების სამშობლოდან" – სამივე გამოფენა საქართველოს მთავრობის დადგენილებით და საქართველოს განათლების, მეცნიერების, კულტურისა და სპორტის სამინისტროს ინიციატივით წარმოდგენილი იყო ფრანკფურტის სამ სხვადასხვა სახელმწიფო მუზეუმში.