სააკაშვილმა კლიჩკოს პარტიის თავმჯდომარეობაზე უარი თქვა

საქართველოს ყოფილმა პრეზიდენტმა, ოდესის ოლქის ყოფილმა გუბერნატორმა, პარტია „ახალი ძალების მოძრაობის“ ლიდერმა მიხეილ სააკაშვილმა უკრაინის დედაქალაქის, კიევის მერის ვიტალი კლიჩკოს პარტიის „უკრაინის დემოკრატიული ალიანსი რეფორმებისათვის“ თავმჯდომარეობაზე უარი განაცხადა. 

„მიუხედავად იმისა, რომ კლიჩკოს ნაბიჯი ღირსეული იყო, მან დახმარების ხელი გამოგვიწოდა, მაგრამ ეს კავშირი ჩვენ არ გვჭირდება. ჩვენ გვაქვს საკუთარი პრინციპები და ამ მიმართულებით კომპრომისებზე წასვლას არ ვაპირებთ. მე უკრაინაში თანამდებობის დასაკავებლად არ ჩამოვსულვარ. ასე რომ მადლობას ვუხდი კლიჩკოს, მაგრამ ჩემთვის გადამწყვეტი ჩემი მხარდამჭერების აზრია. მე თქვენთვის ვცხოვრობ და ჩვენ ერთად გავიმარჯვებთ“, - განაცხადა სააკაშვილმა.

მანამდე უკრაინულ მედიაში ვრცელდებოდა ინფორმაცია, რომ სააკაშვილი კიევის მერის შეთავაზებას უარით უპასუხებს, რასაც კლიჩკოც გამოეხმაურა.

„ვეცნობი სიახლეებს სააკაშვილისა და ჩემი პარტნიორობის შესახებ. ყოველგვარი ემოციების გარეშე მინდა ვთქვა, რომ მე ჩემი გასაკეთებელი გავაკეთე - გულწრფელად, ჩვენს შორის არსებული მეგობრობისა და ურთიერთობების ისტორიის შესაბამისად. დახმარება შევთავაზე მას რთულ სიტუაციაში, მიუხედავად იმისა, რომ არაერთი ჩემი მხარდამჭერი ამ ნაბიჯს არაერთგვაროვნად შეხვდა“, - წერს კლიჩკო Facebook-ის საკუთარ გვერდზე.

მისივე თქმით, სოციალურ ქსელებში ამასთან დაკავშირებით სხვადასხვა აზრები გამოითქვა.

„იყო კარგი და ცუდი კომენტარები, თუმცა ჩემთვის არაფერი შეცვლილა. არსებობს სიტყვები და არსებობს ქმედებები. დემოკრატიისთვის უკეთესი იქნება, რომ პარლამენტში რაც შეიძლება მეტი დემოკრატიული ძალა მოხვდეს“, - წერს კიევის მერი.

ოდესის ყოფილი გუბერნატორის მიხეილ სააკაშვილის პარტია „ახალი ძალების მოძრაობა" უკრაინის რადას არჩევნებში მონაწილეობას გეგმავს.

სააკაშვილი უკრაინაში 29 მაისს ჩავიდა. ეს მას შემდეგ გახდა შესაძლებელი, რაც პრეზიდენტმა ზელენსკიმ მას უკრაინის მოქალაქეობა აღუდგინა. მიხეილ სააკაშვილს უკრაინის მოქალაქეობა ექსპრეზიდენტ პოროშენკოს განკარგულებით 2017 წლის 26 ივლისს ჩამოართვეს.