უკრაინული მედია პრემიერმინისტრობის სავარაუდო კანდიდატებს ასახელებს

უკრაინაში ვადამდელი საპარლამენტო არჩევნების წინასწარი შედეგების გამოქვეყნების პარალელურად, მედია პრემიერმინისტრობის სავარაუდო კანდიდატებს ასახელებს.

სხვადასხვა სააგენტოს ცნობით, ამ თანამდებობაზე განიხილება „ნაფტოგაზის“ ტოპმენეჯერი ანდრეი კობოლევი, ასევე იური ვიტრენკო, უკრაინის თავდაცვისა და უსაფრთხოების საბჭოს მდივანი ალექსანდრ დანი-ლიუკი და საერთაშორისო სავალუტო ფონდში უკრაინის წარმომადგენელი ვლადისლავ რაშკოვანი.

გარდა ამისა, ვრცელდება ცნობები, რომ ზელენსკის ადმინისტრაცია ვიცეპრემიერების კადრის შემცირებასაც გეგმავს.

ზელენსკიმ უკვე განაცხადა, რომ უკრაინის ახალი პრემიერმინისტრი „ეკონომიკის გურუ“ იქნება. პრეზიდენტის აზრით, მთავრობის ხელმძღვანელად უნდა დაინიშნოს „დამოუკიდებელი ძლიერი ადამიანი პროფესიული განათლებით“, რომელიც „პოლიტიკაში არასდროს ყოფილა“. კითხვას, შეიძლება თუ არა პრემიერმინისტრი სვიატოსლავ ვაკარჩუკი გახდეს, ზელენსკიმ უპასუხა: „ჩემი აზრით ეს კითხვა მას, ვაკარჩუკს უნდა დაუსვათ, რადგან ეს დიდი პასუხისმგებლობაა“.

ზელენსკიმ ასევე განაცხადა, რომ ახალი მთავრობის ფორმირებისთანავე და ახალი გენერალური პროკურორის დანიშვნისთანავე (მოქმედმა რადამ გენერალური პროკურორი იური ლუცენკო არ მოახსნევინა) კორუფციონერებთან ბრძოლა დაიწყება. „ახლა გაჩნდება მთავრობა, ახალი გენერალური პროკურორი, რომლებიც ყველა იმ დაპირების შესრულებაზე იმუშავებენ, რომელიც მე წინასაარჩევნო კამპანიისას გავეცი და რომლებიც ჩემმა პარტია „ხალხის მსახურმა“ დაამტკიცა“, - თქვა მან.