NYT-ის გამოძიება: 12 საათის განმავლობაში რუსეთის ავიაციამ 4 საავადმყოფო დაბომბა

2019 წლის 5 და 6 მაისს, რუსეთის ავიაციამ ოთხი საჰაერო იერიში მიიტანა სირიის ჩრდილო-დასავლეთით მდებარე საავადმყოფოებზე. როგორც The New York Times-ი წერს, ამის დამტკიცება ჟურნალისტებმა სირიის მიმართულებით ფრენების, თვითმხილველთა ნაამბობისა და რუსი მფრინავების საუბრების შესახებ მონაცემების ანალიზით შეძლეს.

The New York Times-ის სტატიის თანახმად, რუსეთის ავიაციამ 5 და 6 მაისს, 12 საათის განმავლობაში სირიის ჩრდილო-დასავლეთით მდებარე რაიონებზე, რომლებსაც ანტისახელისუფლებო ძალები აკონტროლებენ, დარტყმების სერია განახორციელა. სამიზნეებს შორის ოთხი არასამხედრო ობიექტი, კერძოდ კი საავადმყოფოები იყო - ნაბად ალ ჰაიათის, კაფრ-ნაბლის, კაფრ-ზიტასი და ალ-ამარის. ყველა მათგანი სირიის პროვინცია იდლიბში მდებარეობდა.

საავადმყოფოებზე ავიაიერიშების უკან რომ რუსეთის კვალი იკვეთებოდა, ამის შესახებ მაისში საერთაშორისო დამკვირვებლებმა განაცხადეს. ივლისში ამ ფაქტთან დაკავშირებით გაეროს უსაფრთხოების საბჭოში გეგრმანიის, ბელგიისა და ქუვეითის ინიციატივით დახურული შეხვედრა გაიმართა.

NYT-ის ცნობით, გაზეთის ჟურნალისტებმა საავადმყოფოებზე საჰაერო თავდასხმებში რუსეთის ბრალეულობა სხვადასხვა წყაროსგან მიღებული ინფორმაციის ანალიზის საფუძველზე დაამტკიცეს: თვითმხილველთა მონაყოლი, სოციალურ ქსელებში გავრცელებული ვიდეოჩანაწერები, სირიის თავზე მფრინავი ვერტმფრენების შესახებ ჩანაწერები, ასევე რუს პილოტებსა და სახმელეთო ძალებს შორის შემდგარი ჩანაწერები.

ამ მონაცემების შედეგად, 5 და 6 მაისს 12 საათის განმავლობაში ფიქსირდება იდლიბის პროვინციაში მდებარე საავადმყოფოების თავზე რუსეთის ავიაციის გადაფრენები. The New York Times-მა გამოძიების შედეგად მფრინავებსა და დისპეჩერს შორის გამართული საუბრებისა და ერთმანეთის მიერ გადაცემული ინფორმაციის ზუსტი საათებიც კი დაადგინა, რასაც შემდეგ ავიადარტყმები მოჰყვა. 

გაზეთი აღნიშნავს, რომ ნაბად ალ ჰაიათის საავადმყოფო ავიადარტყმის მომენტში ევაკუირებული იყო, თუმცა დანარჩენ საავადმყოფოებზე იერიშების დროს ხალხი დაიღუპა. ამასთან, ოთხივე საავადმყოფო სპეციალურად შედგენილ სიაში იყო, რომელიც გადაცემული იყო გაეროში, რათა ამ ტერიტორიებზე ავიადარტყმები არ განხორციელებულიყო. გაზეთი სირიელ მედიკოსებზე დაყრდნობით წერს, რომ ამ საავადმყოფოების კოორდინატები რუსებმა შესაძლოა სწორედ ამ სპეციალური სიიდან აიღეს. 

The New York Times-ი ამერიკულ უფლებადაცვით ორგანიზაციაზე Physicians for Human Rights დაყრდნობით წერს, რომ სირიაში სამოქალაქო ომის დაწყებიდან საავადმყოფოებსა და ჰოსპიტალებზე 583 თავდასხმა განხორციელდა. 266 თავდასხმა 2015 წლის სექტემბრის შემდეგ მოხდა - მას შემდეგ რაც სირიაში საბრძოლო მოქმედებები რუსეთმა დაიწყო. ავიადარტყმებს სულ ცოტა 916 სამედიცინო მუშაკი ემსხვერპლა, 2019 წლის მაისიდან კი ავიადარტყმების სამიზნე 10-ზე მეტი საავადმყოფო გახდა. 

როგორც The New York Times-ი წერს, სამედიცინო დაწესებულებებზე თავდასხმა შეიძლება განხილულ იქნეს, როგორც ომის დანაშაული. გაზეთის ინფორმაციით, მათ რუსეთის საგარეო საქმეთა სამინისტროში ჟურნალისტური გამოძიების შედეგებთან დაკავშირებით კომენტარზე უარი განუცხადეს და შემოიფარგლნენ მანამდე გაკეთებული განცხადებით, რომ რუსეთის თავდაცვის სამინისტროს ავიაცია წინასწარ კარგად შემოწმებულ სამიზნეებზე ზუსტ ავიადარტყმებს ახორციელებს.

სექტემბერში BBC-იმ მოამზადა სიუჟეტი სირიაში იმ საავადმყოფოების შესახებ, რომლებიც მიწის ქვეშ ფუნქციონირებენ. სიუჟეტის თანახმად, აპრილის შემდეგ იდლიბში 40 სამედიცინო დაწესებულება გახდა ავიადარტყმების სამიზნე. თუმცა არსებობს რამდენიმე საავადმყოფო, რომელიც მიწის ქვეშ მდებარეობს, რათა ექიმებმა თავის გადარჩენა და სხვების დახმარება ისევ შეძლონ. გაერო აცხადებს, რომ სირიის ხელისუფლებისა და რუსეთის საბრძოლო თვითმფრინავები მომაკვდინებელ კამპანიას აწარმოებენ, რომლის სამიზნეც საავადმყოფოები ხდება.