ამერიკელმა 12 წელი ციხეში გაატარა დანაშაულისთვის, რომელიც მას არ ჩაუდენია

ნოემბრის დასაწყისში ციხიდან გაათავისუფლეს ლოს-ანჯელესის მკვიდრი რუბენ მარტინესი, რომელსაც ძარცვების სერიის გამო 47-წლიანი პატიმრობა ჰქონდა მისჯილი. მის ისტორიაზე Guardian-ი წერს.

კაცმა ციხეში 12 წელი გაატარა, სანამ მან და მისმა ცოლმა მარტინესის უდანაშაულობა არ დაამტკიცეს. 49 წლის კაცი 2007 წელს დააკავეს. იმ დროისთვის ის მუშად მუშაობდა და ძირითადად ლათინოამარიკელებით დასახლებულ კვარტალში ცხოვრობდა.

დაკავების დღეს მარტინესი დილის 4:30 წუთზე ადგა და მთელი დღე ავეჯის დაცლაზე მუშაობდა. სამსახურის დასრულების შემდეგ ის ალკოჰოლის მაღაზიისკენ გაემართა, სადაც სამართალდამცველებმა დააკავეს. 

მარტინესი პოლიციის განყოფილებაში გადაიყვანეს, სადაც მან გაიგო, რომ შეიარაღებული ძარცვების სერიაში იყო ეჭვმიტანილი. სამართალდამცველები მას კითხვას უსვამდნენ, თუ ვისთან ჰქონდა ურთიერთობები და ჰქონდა თუ არა ტატუები. ასევე მას სთხოვეს, მღებავის ჩაფხუტი მოეზომებინა. დაკითხვის შემდეგ ის დააპატიმრეს.

საბოლოოდ კაცს 2005-2007 წლებში ჩადენილ 5 ძარცვაში წაუყენეს ბრალი, რომელიც ერთსა და იმავე მაღაზიაში მოხდა. ბრალდება ეყრდნობოდა მოწმის ჩვენებას, რომელმაც მარტინესში მძარველი ამოიცნო, მიუხედავად იმისა, რომ ბოროტმოქმედი ნიღბით იყო.

ამავე დროს მარტინესის ბრალის დამამატკიცებელი საბუთები არ არსებობდა: დანაშაულის ადგილზე აღმოჩენილი თითის ანაბეჭდები მისას არ შეესაბამებოდა. კაცმა ბრალის აღიარება უარი თქვა, თუმცა გამოძიება მას ჰპირდებოდა, რომ ბრალის აღიარების შემთხვევაში მხოლოდ 2-წლიან პატიმრობას მიუსჯიდა.

2007 წელს მარტინესის სასამართლო პროცესზე ნაფიცი მსაჯულების აზრი მის დამნაშავეობაზე ორად გაიყო. პროკურატურამ მეორე სასამართლო პროცესი მოითხოვა, რომლის შედეგებითაც მარტინესი დამნაშავედ ცნეს. მიუხედავად იმისა, რომ 5 ძარცვიდან 2-ის შემთხვევაში კაცი სამსახურში იყო.

2008 წელს მატინესს თავისუფლების 47 წლით აღკვეთა მიუსაჯეს. განაჩენის გამოტანის დღეს მისი ძმისშვილი მოკლეს, თუმცა მარტინესს ცოლმა ეს ამბავი არ უთხრა.

სასამართლოდან მალევე კაცი ლოს-ანჯელესიდან 200 კილომეტრის მოშორებით მდებარე ციხეში გადაიყვანეს, რის გამოც ნათესავების უმრავლესობამ მისი ნახვის შესაძლებლობა დაკარგა.

მარტინესის ცოლი მარია ადრე პოლიციაში მდივნად მუშაობდა. ის მისი ქმრის უდანაშაულობის მტკიცებულებების შეგროვებას განაგრძობდა. ქალს განაჩენის გასაჩივრებაზე რამდენჯერმე უარი უთხრეს. 2015 წელს მარიამ ძალაში შესული სასამართლო განაჩენების შემოწმების კომისიას მიმართა, რომლის ორგანიზატორი ლოს-ანჯელესის საოლქო პროკურორი ჯეკი ლეისი იყო.

მარტინესის ცოლმა დამოუკიდებლად, ადვოკატის დახმარების გარეშე ქმრის გაანჩენის გადახედვის თხოვნა შეავსო. მას მხოლოდ მეგობარი ეხმარებოდა, რომელიც ყოფილი დეტექტივია.

კომისიამ საქმის მასალები ხელახლა შეისწავლა და დაასკვნა, რომ მარტინესს არ შეეძლო ჩაედინა ძარცვები, რომელშიც ის დაადანაშაულეს. ამის გამო განაჩენი გადაიხედა და საბოლოოდ, კაცი გაამართლეს.

რუბენ მარტინესი კომპენსაციის სახით 600 000-ზე მეტ დოლარს მიიღებს: ციხეში გატარებული თითო დღისთვის 140 დოლარს.