აშშ-ის მეთოდისტური ეკლესია ლგბტ საკითხებზე უთანხმოების გამო ტრადიციონალისტებმა დატოვეს

2020 წლის მაისში აშშ-ის გაერთიანებულ მეთოდისტურ ეკლესიას ტრადიციონალისტთა ჯგუფი დატოვებს, რომლებიც ერთნაირსქესიანთა ქორწინების აღიარებას და ლგბტ თემის წარმომადგენელთა სასულიერო პირებად კურთხევას ეწინააღმდეგებიან. ამის შესახებ ეკლესიის მეთაურების განცხადებაზე დაყრდნობით გამოცემა The Washington Post-ი წერს.

მეთოდისტები ლუთერანებთან და პრესვიტერიანებთან ერთად ე.წ. პროტესტანტური მეინსტრიმს წარმოადგენენ. WP-ს ცნობით, აშშ-ის „დამფუძნებელი მამების“ და პრეზიდენტების უმეტესობა სწორედ ამ მიმართულებას ეკუთვნოდნენ. ამასთან ერთად, Pew Research Center-ის კვლევის თანახმად, პროტესტანტური მეინსტრიმის წარმომადგენლებად თავს ამერიკელების 15% თვლის. 20% თავს კათოლიკეს, 25% კი ევანგელისტს უწოდებს. 

ამერიკელი ევანგელისტები ნეგატიურად აფასებენ ერთნაირსქესიანთა ​ურთიერთობებს და ამბობენ, რომ ბიბლია მათ ცოდვას უწოდებს. მეთოდისტებს შორის ამ საკითხზე დავა არაერთი წელი მიმდინარეობს. 2012 წლის მონაცემებით, გაერთიანებული მეთოდისტური ეკლესიის მრევლად თავს 7,5 მილიონი ადამიანი თვლიდა, რაც რომის კათოლიკური ეკლესიისა (68 მილიონი ადამიანი) და ევანგელისტური „ბაპტისტების სამხრეთის კონვენციის“ (16 მილიონი ადამიანი) შემდეგ მათ აშშ-ში რაოდენობით მესამე ქრისტიანულ კონგრეგაციად აქცევს.

აშშ-ში მცხოვრები მეთოდისტები ექვემდებარებიან მეთოდისტების მსოფლიო საბჭოს, რომელშიც ერთნაირსქესიანთა ქორწინების მოწინააღმდეგეთა რიცხვი გაცილებით დიდია. 2019 წლის თებერვალში ეს საკითხი ეკლესიის რიგგარეშე გენერალურ კონფერენციაზე განიხილებოდა. ლიბერალი ამერიკელი მეთოდისტები ან ერთნაირსქესიანთა ​ქორწინებების ლეგალიზაციას, ან ამ საკითხთან დაკავშირებით გადაწყვეტილების მიღების უფლებამოსილების ადგილობრივი თემებისთვის გადაცემას ითხოვდნენ. საბოლოო ჯამში დელეგატების 53%-მა ე.წ. ტრადიციონალისტურ გეგმას დაუჭირა მხარი, რომელიც ასეთი ქორწინებების მიმართ ეკლესიის მხრიდან კატეგორიულ უარს ითვალისწინებდა.

ეკლესიის ორად გაყოფის შესახებ გადაწყვეტილება მხარეებმა რამდენიმეთვიანი მოლაპარაკებების შემდეგ მიიღეს. ტრადიციონალისტების ჯგუფი ყოფილი ერთმორწმუნეების ქონებაზე უარის სანაცვლოდ 25 მილიონ დოლარს მიიღებს.

აშშ-ის უზენაესმა სასამართლომ 2015 წლის ივნისში ანტიკონსტიტუციურად ცნო ყველა კანონი, რომელიც ერთნაირსქესიანთა ქორწინებას კრძალავს. 2019 წლის მაისში ამერიკელთა 63%-მა აცხადებდა, რომ ასეთ ქორწინებებს მხარს უჭერენ. ამასთან ერთად, 2019 წლის ზაფხულში Pew Research Center-ის მიერ ჩატარებული კვლევის თანახმად, ქრისტიანებად თავს ამერიკელთა 65% თვლის, რაც 10 წლის წინანდელ მაჩვენებელზე 13%-ით ნაკლებია.