გამოძიება ტრამპის ყოფილი თანაშემწისთვის ექვსთვიან პატიმრობას ითხოვს

აშშ-ის პრეზიდენტის დონალდ ტრამპის ეროვნული უსაფრთხოების საკითხებში ყოფილი თანაშემწის, მაიკლ ფლინისთვის გამოძიება ექვსთვიან პატიმრობას ითხოვს. გამოცემა The Washington Post-ის ცნობით, ამის შესახებ ვაშინგტონის ფედერალური სასამართლოს მიერ გავრცელებულ ინფორმაციაშია ნათქვამი.

გამოძიება სასამართლოს სთხოვს, გაითვალისწინოს დანაშაულის სიმძიმე და ის გარემოება, რომ ფლინმა ბრალი არ აღიარა და გამოძიებასთან არ თანამშრომლობდა. ფლინის საქმეზე განაჩენის გამოცხადება რამდენჯერმე გადაიდო და მიმდინარე წლის 28 იანვარსაა დაგეგმილი.

2018 წლის თებერვალში მაიკლ ფლინს თანამდებობის დატოვება მოუწია, ვინაიდან მან აშშ-ში რუსეთის იმჟამინდელ ელჩ სერგეი კისლიაკთან თავისი საუბრების შესახებ ვიცეპრეზიდენტ მაიკ პენსს არასრული ინფორმაცია მიაწოდა.

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ, რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ის ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ბრალი 34 ადამიანს წაუყენეს. მათ შორის იყვნენ აშშ-ის ტრამპის საარჩევნო შტაბის ყოფილი ხელმძღვანელი პოლ მანაფორტი, პრეზიდენტის ყოფილი მრჩეველი ეროვნული უსაფრთხოების საკითხებში მაიკლ ფლინი, საარჩევნო შტაბის ხელმძღვანელის ყოფილი მოადგილე რიკ გეიტსი, ტრამპის ყოფილი პირადი ადვოკატი მაიკლ კოენი და ასევე ყოფილი მრჩეველი როჯერ სტოუნი.

2019 წლის 23 მარტს აშშ-ის რობერტ მიულერის კომისიამ გამოძიება დაასრულა. მისი დასკვნის თანახმად, დონალდ ტრამპის ან მის წინასაარჩევნო შტაბში მომუშავე რომელიმე პირის რუსეთთან კავშირი არ დადასტურდა.