ირანში ბრიტანეთის ელჩი დაკავების დეტალებზე სოციალურ ქსელში წერს

ირანში დიდი ბრიტანეთის ელჩი რობერტ მაკეირი დემონსტრაციაში მონაწილეობას უარყოფს და აცხადებს, რომ უკანონოდ დააკავეს. Twitter-ზე განთავსებულ ტექსტში ბრიტანელი დიპლომატი მომხდარის დეტალებს იხსენებს. 

Thanks for the many goodwill messages. Can confirm I wasn’t taking part in any demonstrations! Went to an event advertised as a vigil for victims of #PS752 tragedy. Normal to want to pay respects- some of victims were British. I left after 5 mins, when some started chanting.

— Rob Macaire (@HMATehran) January 12, 2020

„დემონსტრაციაში მონაწილეობა არ მიმიღია. ნორმალურია, რომ პატივის მიგება მინდოდა ტრაგედიის მსხვერპლთათვის. ზოგი მათგანი ბრიტანელი იყო. 5 წუთის შემდეგ ტერიტორია დავტოვე. ერთი საათის შემდეგ დამაკავეს. დიპლომატის დაკავება ყველა ქვეყანაში უკანონოა“, - წერს ბრიტანელი დიპლომატი. 

თეირანის ვერსიით, 11 იანვარს, ირანელი სტუდენტების აქციაში, რომელიც უკრაინული თვითმფრინავის ჩამოგდებას ეძღვნებოდა, დიდი ბრიტანეთის ელჩი მონაწილეობდა. 

დიპლომატი დაკავებიდან რამდენიმე საათში გაათავისუფლეს.

მომხდარი დიდი ბრიტანეთის საგარეო საქმეთა მინისტრმა დომინიკ რააბმა საერთაშორისო სამართლის უხეშ დარღვევად შეაფასა.

თეირანში უკრაინული ავიახაზების თვითმფრინავი ჩამოვარდა, რასაც 176 მგზავრი ემსხვერპლა.

11 იანვარს ირანმა განაცხადა, რომ ავიალაინერი შეცდომით ჩამოაგდო, პრეზიდენტმა ჰასან როუჰანიმ კი მომხდარი უპატიებელი ადამიანური შეცდომით ახსნა, 

თვითმფრინავის ჩამოგდებაზე პასუხისმგებლობა ელიტურმა სამხედრო ქვედანაყოფმა, „ისლამური რევოლუციის გუშაგთა კორპუსმა“ აიღო.

ამის შემდეგ თეირანში აიათოლა ალი ხამენეის გადადგომის მოთხოვნით საპროტესტო აქციები დაიწყო.