რუსეთში მთავრობა გადადგა

რუსეთის მთავრობა სრული შემადგენლობით გადადგა. ადგილობრივი მედიის ინფორმაციით, ამის შესახებ პრემიერმინისტრმა დიმიტრი მედვედევმა მინისტრთა კაბინეტის პრეზიდენტ ვლადიმერ პუტინთან შეხვედრისას განაცხადა. პუტინი მინისტრებს თავისი მიმართვის შემდეგ შეხვდა, რომლის ფარგლებში კონსტიტუციაში ცვლილების შეტანის ინიციატივით გამოვიდა. 

მედვედევმა აღნიშნა, რომ შეთავაზებული ცვლილებები აღმასრულებელი, საკანონმდებლო და სასამართლო ხელისუფლებას შორის ბალანსს შეცვლის. 

„ამ კონტექსტიდან გამომდინარე ცხადია, რომ ჩვენ, როგორც რუსეთის ფედერაციის მთავრობამ, ქვეყნის პრეზიდენტს ამ პირობებში აუცილებელი გადაწყვეტილებების შესაძლებლობა უნდა მივცეთ“, - განაცხადა მედვედვმა.

მინისტრთა კაბინეტი მოვალეობების შესრულებას ახალი მთავრობის დამტკიცებამდე განაგრძობს. ჯერჯერობით უცნობია, ვინ გახდება რუსეთის ახალი პრემიერი, თუმცა როგორც ჩანს მედვედევი ამ თანამდებობაზე არ დაბრუნდება. პუტინმა განაცხადა, რომ ახალ თანამდებობას შემოიღებს - უშიშროების საბჭოს თავმჯდომარის მოადგილის და მედვედევს ამ თანამდებობის დაკავებას შესთავაზებს. 

ფედერალური კრების წინაშე გამოსვლისას ვლადიმერ პუტინი სახელმწიფო დუმისთვის პრემიერმინისტრის კანდიდატურის დამტკიცების უფლების გადაცემის ინიციატივით გამოვიდა. კრემლის ლიდერმა ხაზი გაუსვა, რომ პრემიერმინისტრის, მისი მოადგილეებისა და სხვა მინისტრების გადაყენების უფლება პრეზიდენტს უნდა დარჩეს იმ შემთხვევაში, თუ მათი ნდობა ეჭქვეშ დადგება ან თავიანთ მოვალეობას სათანადოდ არ შეასრულებენ.

რუსეთის პრეზიდენტმა დღეს ფედერალურ კრებას მიმართა, რა დროსაც კონსტიტუციის რეფორმის ინიციატივა წარადგინა. რომელიც გულისხმობს, პრეზიდენტის უფლებამოსილებათა ნაწილის პარლამენტისთვის გადაცემას, საპრეზიდენტო კანდიდატებისთვის მოთხოვნების გამკაცრებას და რუსეთის ტერიტორიაზე საერთაშორისო სამართალის პრიორიტეტულობის შეზღუდვას.