სინგაპურის ჯანდაცვის მინისტრი: ჯანმრთელი ადამიანის მიერ პირბადის ტარება მას უსაფრთხოების ცრუ განცდას უქმნის

სინგაპურის ჯანდაცვის მინისტრმა გაან კიმ იონგმა მოსახლეობას კორონავირუსის გავრცელების შესახებ ინფორმაცია მიაწოდა. მან ვირუსის პრევენციის ზომებზე ისაუბრა და რჩევებიც გაავრცელა.

კერძოდ, მინისტრმა აღნიშნა, რომ ჯანმრთელი ადამიანის მიერ პირბადის ტარება მას უსაფრთხოების ცრუ განცდას უქმნის. ამასთან, პირბადის ტარებისას ადამიანი ხშირად ეხება საკუთარ სახეს, როცა ნიღბის გასწორებას ცდილობს, რაც დაავადების გავრცელების ერთ-ერთი გზაა.

მინისტრის თქმით, ვირუსის გადაცემა ძირითადად წვეთოვანი გზით ხდება, შესაბამისად მისი გავრცელების საუკეთესო პრევენცია პირადი ჰიგიენის წესების დაცვაა.

„ვირუსი არსებობს წვეთებში, რომლებსაც გამოსცემს ინფიცირებული ადამიანი მოკლე დისტანციაზე, მაგალითად როდესაც ადამიანი ახველებს ან აცემინებს. თუ ეს წვეთები ეხება ადამიანის თვალებს, ცხვირს ან პირს პირდაპირი ან არაპირდაპირი გზით, მაგალითად ხელით, რომელიც კონტაქტში იყო ამ წვეთებთან, შესაძლებელია, მოხდეს ადამიანის ინფიცირება. ამიტომ რეგულარულად უნდა დავიბანოთ ხელები წყლით და საპნით და უნდა მოვერიდოთ ხელით სახის შეხებას”, - განაცხადა მინისტრმა.

მისი თქმით, ვირუსის გადაცემა შეიძლება მოხდეს ზედაპირთან კონტაქტითაც. როდესაც ადამიანი ახველებს ან აცემინებს, წვეთები ხვდება მაგიდების ან სკამების ზედაპირზე და ასეთ ზედაპირზე ვირუსმა შესაძლოა სიცოცხლისუნარიანობა რამდენიმე დღის განმავლობაში შეინარჩუნოს.

„როდესაც ადამიანი ეხება ასეთი მაგიდების ან სკამების ზედაპირს, მაშინ ვირუსი შესაძლოა მოხვდეს მის ხელებზე და თუ ეს ადამიანი ხელების დაბანის გარეშე შეეხება თვალებს ან ცხვირს, შესაძლებელია დაინფიცირდეს. შესაბამისად, ხშირად უნდა დავიბანოთ ხელები. სწორედ ეს არის მიზეზი იმისა, რომ კარანტინში ხვდებიან ის პირები, რომლებიც მჭიდრო კონტაქტში იყვნენ ინფიცირებულ პირებთან. რაც შეეხება ისეთ შემთხვევებს, როდესაც ინფიცირებულმა პირმა სასტუმროსა თუ სავაჭრო ცენტრებში სხვა პირების სიახლოვეს ჩაიარა, ინფიცირების რისკი დაბალია”, - აცხადებს სინგაპურის ჯანდაცვის მინისტრი. მისივე განმარტებით, ზოგადად, კორონავირუსი ყველაზე გადამდებია მაშინ, როდესაც ადამიანს გამოხატული აქვს სიმპტომები.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც 26 თებერვალს აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება.

კორონავირუსის მეორე შემთხვევა საქართველოში 2020 წლის 28 თებერვალს 28 თებერვალს, მესამე კი 29 თებერვალს დადასტურდა. 26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.