ლორა თორნტონი: როდესაც ტრამპი პირს აღებს, ის აფრქვევს დეზინფორმაციას, რომელსაც სავალალო შედეგები მოჰყვება

აშშ-ის ეროვნულ-დემოკრატიული ინსტიტუტის (NDI) საქართველოს ოფისის ყოფილმა ხელმძღვანელმა, ლორა თორნტონმა თეთრი სახლის ლიდერი, დონალდ ტრამპი გააკრიტიკა.

„ყოველ ჯერზე, როდესაც ტრამპი პირს აღებს, იგი აფრქვევს დეზინფორმაციას, რომელსაც სავალალო შედეგები მოჰყვება. მან მოიტყუა საკმარისი ოდენობის ტესტების ჩატარების შესახებ. მან მოიტყუა ტესტების ხარისხის შესახებ. ბოლო გამოსვლაში მან დაასახელა სტრატეგიის სამი მთავარი მიმართულება. სამივე აღმოჩნდა სიცრუე, რომლის გამოსწორებაც მოგვიანებით ადმინისტრაციას მოუწია. გარდა ამისა, ამ სტრატეგიამ გამოიწვია მოკავშირეთა რისხვა და პანიკა ევროპის ქვეყნების აეროპორტებში, რითაც უფრო მეტი ადამიანი აღმოჩნდა დაუცველი ვირუსის წინაშე – სულ რომ არაფერი ვთქვათ ქსენოფობიაზე მის კომენტარებში (განცხადებები მექსიკასთან საზღვარზე კედლის აშენების აუცილებლობის შესახებ – ყველაფერი უცხოელებს დავაბრალოთ?) და ნარცისიზმით გაჯერებული მანია იმასთან დაკავშირებით, თუ რა ზიანს აყენებს ეს ყველაფერი პირადად მას, მის რეიტინგებს და არა საზოგადოების ჯანმრთელობას. ამ კრიზისულ დროს ჩვენ ჰაერივით გვჭირდება პრეზიდენტი, რომელიც სიმართლეს გვეტყვის. რადგან ტრამპს ეს არ შეუძლია, მან უნდა მოკეტოს! წადი, გოლფი ითამაშე ან სხვა რამით დაკავდი. ტრამპი ყველას გვაყენებს საფრთხის ქვეშ. ჩვენ გვჭირდება კომპეტენტურობა და სიმართლე ხელისუფლებაში. სამწუხაროდ, ამჟამინდელ ადმინისტრაციაში არც ერთია და არც მეორე”, - წერს ლორა თორნტონი Facebook-ზე.

ბოლო მონაცემებით, აშშ-ში კორონავირუსით ინფიცირების 2033 შემთხვევა დაფიქსირდა, ხოლო 47 ადამიანი გარდაიცვალა. კორონავირუსი აშშ-ის 48 შტატშია გავრცელებული.

კორონავირუსის გავრცელებით გამოწვეული სიტუაციის გამო აშშ-ის პრეზიდენტმა 15 მარტი ლოცვის ეროვნულ დღედ გამოაცხადა. 2020 წლის 13 მარტს კი მან ქვეყანაში საგანგებო მდგომარეობა გამოაცხადა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.