დავით ზალკალიანი: საუბარია არა რიგით მოქალაქეზე, არამედ მსჯავრდებულ და ძებნილ ადამიანზე, რაც საფუძვლიანად ცვლის სურათს

რა თქმა უნდა, უკრაინას აქვს უფლება დანიშნოს ამა თუ იმ თანამდებობაზე ნებისმიერი ადამიანი, მაგრამ როდესაც საუბარია მსჯავრდებულ და ძებნილ ადამიანზე, რომლის ექსტრადიციის თხოვნითაც ჩვენ კიევს მივმართეთ, ეს საფუძვლიანად ცვლის საერთო სურათს, - ამის შესახებ ტელეკომპანია „იმედის“ გადაცემაში „დღის ქრონიკა“ საგარეო საქმეთა მინისტრმა, დავით ზალკალიანმა განაცხადა.

„რამდენიმე დღის წინ მე მქონდა ძალიან საგნობრივი და შინაარსობრივი საუბარი ჩემს უკრაინელ კოლეგასთან. რადაში განვითარებულმა პროცესებმა აჩვენა, რომ უკრაინის მმართველ პარტიაში არის საღი ძალა, რომელიც კარგად აცნობიერებს, რა შეიძლება მოჰყოლოდა სააკაშვილის ვიცე-პრემიერად დანიშვნას. მიუხედავად იმისა, რომ საბოლოოდ სააკაშვილისთვის შეთავაზებული თანამდებობა ნაკლებად მნიშვნელოვანია, ქართული სასამართლოს მიერ მსჯავრდებული და ოფიციალურად ძებნილი ადამიანის დანიშვნა შეკითხვებს იწვევს. ამის გამო მივიღეთ გადაწყვეტილება ელჩის კონსულტაციებისთვის გამოწვევის თაობაზე. ეს დიპლომატიური ნაბიჯი მიანიშნებს იმაზე, რომ ორმხრივ ურთიერთობებში გარკვეული პრობლემები შეიქმნა. მიუხედავად კიევის მიერ მიღებული ამ დასანანი გადაწყვეტილების ჩვენ არც ერთ შემთხვევაში არ განვიხილავთ დიპლომატიური ურთიერთობების გაწყვეტას, ვინაიდან ეს არ შეესაბამება ჩვენს მეგობრულ ურთიერთობებს“, - განაცხადა ზალკალიანმა.

ის ასევე გამოეხმაურა უკრაინის საგარეო საქმეთა სამინისტროს განცხადებას, რომელშიც ოფიციალურმა კიევმა თავისი პოზიციის არგუმენტები განმარტა.

„საერთოდ, ეს თანამდებობა და მისი შინაარსი იმდენად ბუნდოვანია, რომ მე არასერიოზულადაც კი მეჩვენება, თუ როგორ შეიძლება ამ პოზიციიდან სააკაშვილმა უკრაინას სარგებელი მოუტანოს. ეს საბჭო წინა პრეზიდენტის დროსაა შექმნილი და 2018 წლის შემდეგ ამ უწყების სხდომები არც ჩატარებულა. თუმცა ეს მათი საქმეა, მაგრამ არის კიდევ ერთი არსებითი მნიშვნელობის საკითხი. ჩვენ ვსაუბრობთ არა სააკაშვილზე, როგორც უკრაინის რიგით მოქალაქეზე, არამედ როგორც ქართული სასამართლოს მიერ მსჯავრდებულ ადამიანზე. სააკაშვილი რომ უბრალოდ უკრაინის მოქალაქე ყოფილიყო და მასზე არ გვქონდეს გამოცხადებული ოფიციალური ძებნა და მიმართვა ექსტრადიციის შესახებ, ეს სულ სხვა საკითხი იქნებოდა. რა თქმა უნდა, უკრაინას აქვს უფლება დანიშნოს ამა თუ იმ თანამდებობაზე ნებისმიერი ადამიანი, მაგრამ როდესაც საუბარია მსჯავრდებულ და ძებნილ ადამიანზე, რომლის ექსტრადიციის თხოვნითაც ჩვენ კიევს მივმართეთ, ეს საფუძვლიანად ცვლის საერთო სურათს“, - განაცხადა საგარეო საქმეთა მინისტრმა.

7 მაისს საქართველოს ყოფილი პრეზიდენტი მიხეილ სააკაშვილი უკრაინის რეფორმების აღმასრულებელი კომიტეტის ხელმძღვანელად დაინიშნა.

22 აპრილს ცნობილი გახდა, რომ მიხეილ სააკაშვილს უკრაინის ვიცე-პრემიერის თანამდებობა შესთავაზეს. თუმცა 30 აპრილს მთავრობამ პარლამენტიდან სააკაშვილის კანდიდატურა გაიწვია.