მსოფლიო აშშ-ის პარიზის კლიმატის შეთანხმებიდან გასვლას აკრიტიკებს

მსოფლიო დონალდ ტრამპის გადაწყვეტილებას ეხმაურება და აშშ-ის პარიზის კლიმატის შეთანხმებიდან გასვლას აკრიტიკებს. ქვეყნები, საერთაშორისო ორგანიზაციები და პოლიტიკოსები აცხადებენ, რომ ამერიკის გადაწყვეტილება სახიფათო და სამწუხაროა.

2015 წელს გაფორმებული შეთანხმება ამ სფეროში ყველაზე სერიოზულ დოკუმენტად არის მიჩნეული, რომელსაც მისი მხარდამჭერები "კაცობრიობის მომავალსაც" უწოდებდნენ. ამერიკის შეერთებული შტატების მიერ შეთანხმების დატოვებას უკვე შეარქვეს "შავი დღე მწვანეებისთვის".

თავად ტრამპმა განაცხადა, რომ, გადაწყვეტილების მიუხედავად, ვაშინგტონი გარემოს დაცვის პოლიტიკის ერთგული რჩება. გაეროში აშშ-ის ელჩის ნიკი ჰეილის თქმით, შეთანხმებიდან გასვლის შემდეგაც ამერიკა გარემოს დაცვის საქმეში ლიდერად დარჩება.

ამერიკაში, მთავრობის ნაბიჯს უკვე გამოეხმაურნენ. მაგალითად, The Walt Disney Company-ის ხელმძღვანელმა რობერტ იგერმა პროტესტის ნიშნად პრეზიდენტთან არსებული საბჭო დატოვა. საბჭო დატოვა ასევე ბიზნესმენმა ილონ მასკმა. "მომავალზე უარის თქმა" უწოდა გადაწყვეტილებას აშშ-ის ყოფილმა პრეზიდენტმა ბარაკ ობამამ, რომელმაც ხელი მოაწერა ამ შეთანხმებას.

გადაწყვეტილებას თეთრ სახლთან უკვე ასობით ადამიანი აპროტესტებს. 

აშშ-ის ნაბიჯი დაგმო ორგანიზაცია Green Peace-ის ოფისმა შვედეთში, თუმცა დასძინა, რომ დანარჩენი მსოფლიო ამერიკის წვლილის გარეშეც განაგრძობს კლიმატის ცვლილებებთან ბრძოლას; 

ბრიტანეთის პრემიერმინისტრმა ტერეზა მეიმ თქვა, რომ ვაშინგტონის გადაწყვეტილებით იმედგაცრუებულია; იმედგაცრუებულია კანადის პრემიერმინისტრი ჯასტინ ტრიუდოც; იტალიის გარემოს დაცვის მინისტრმა ჯან ლუკა გალეტიმ აშშ-ის ნაბიჯს სახიფათო უწოდა, ავსტრიის ეკოლოგიის მინისტრმა კი წინდაუხედავი; გადაწყვეტილება გააკრიტიკა იტალიის ყოფილმა პრემიერმინისტრმა მატეო რენციმ;

ევროკავშირმა იმედი გამოთქვა, რომ ვაშინგტონი შეუერთდება კლიმატის ცვლილებებთან ბრძოლას, რადგან მისი გასვლა შეთანხმებიდან გარემოს დაცვის საქმეს დააზიანებს და კიდევ ერთხელ დაადასტურა ერთგულება დოკუმენტის მიმართ;

ტრამპის ნაბიჯს სამწუხარო უწოდეს გერმანიამ და საფრანგეთმა.

პრეზიდენტმა მაკრონმა დონალდ ტრამპთან სატელეფონო საუბარში თქვა, რომ აშშ-ის გადაწყვეტილებამ დღის წესრიგიდან მოხსნა ახალ შეთანხმებებზე შემდგომი მოლაპარაკებები. საფრანგეთში, ამერიკის გადაწყვეტილების პასუხად, პარიზის და მონრეალის მერიის შენობები მწვანედ გაანათეს.

მექსიკამ დაადასტურა მისი ერთგულება პარიზის შეთანხმების მიმართ, ხოლო ბოლივიის პრეზიდენტმა ევო მორალესმა თქვა, რომ აშშ-ის მთავრობამ დედამიწას უღალატა. ფაქტს სამწუხარო უწოდა რუსეთის დუმის საერთაშორისო საქმეთა კომიტეტის თავმჯდომარემ, ლეონიდ სლუცკიმ. შეთანხმების მიმართ ერთგულება დაადასტურა ჩინეთის ხელისუფლებამაც.

გაეროში, აშშ-ის ნაბიჯი შეაფასეს, როგორც დიდი იმედგაცრუება. ვაშინგტონის შეთანხმებიდან გასვლა გაეროს პროცედურების თანახმად უნდა წარიმართოს და, სავარაუდოდ, დასჭირდება ოთხი წელი.

თავიანთი პოზიციები ასევე დააფიქსირეს ვარსკვლავებმა, რომელთათვის ტრამპის გადაწყვეტილება მიუღებელია. 

fucking clown  https://t.co/qkp9qaxrfe pic.twitter.com/BK2lqCuHEC

— Thom Yorke (@thomyorke) June 1, 2017

Very much enjoying the German press at the moment. "Earth to Trump..." pic.twitter.com/sPqkUPYVlw

— J.K. Rowling (@jk_rowling) June 2, 2017

We remember the great leaders - the great leaders that don't walk backwards into the past but charge forward to the future. https://t.co/HthOP9YLf7

— Arnold (@Schwarzenegger) June 2, 2017

 
პარიზის კლიმატის შეთანხმება პირველი გლობალური კლიმატური შეთანხმებაა, რომელსაც 2015 წელს პარიზში 194-მა ქვეყანამ მოაწერა ხელი. დოკუმენტი გლობალური დათბობის შეკავების სამოქმედო გეგმაა.