სეშნსი: რუს დიპლომატებთან არჩევნების თაობაზე არასდროს მისაუბრია

აშშ-ის გენერალურმა პროკურორმა ჯეფ სეშსნმა, სენატის კომიტეტის ჩვენებაზე განაცხადა, რომ არასდროს ულაპარაკია რუსეთის წარმომადგენლებთან აშშ-ის არჩევნების შესახებ. ინფორმაციას ავრცელებს BBC.

"არასდროს შევხვედრილვარ არც რუს და არც სხვა უცხოური ქვეყნის წარმომადგენელს, ამერიკული არჩევნების თაობაზე", - განაცხადა სეშნსმა. გარდა ამისა, მან ხაზი გაუსვა, რომ "რუსეთის მიერ, აშშ-ის არჩევნებში შემოჭრა - მიუღებელია". 

სეშნსმა ასევე უარყო სასტუმრო Mayflower-ში, რუსეთის ელჩ, სერგეი კისლიაკთან შეხვედრის ბრალდებაც. 

დღეს, სენატის დაზვერვის კომიტეტის სხდომა მიმდინარეობს. Washington Post-ის ინფორმაციით, შარშან, ჯოზეფ სეშნსი რუსეთის ელჩს აშშ-ში კისლიაკს ორჯერ ელაპარაკა. გაზეთი იუსტიციის სამინისტროს წყაროზე დაყრდნობით წერს, რომ აშშ-ის კონგრესში, სეშნსის კანდიდატურის განხილვისას, მას ჰკითხეს, ჰქონდა თუ არა კონტაქტი რუსეთის წარმომადგენლებთან, რაზეც მან უარყოფითად უპასუხა და კონგრესს დაუმალა კისლიაკთან კავშირის შესახებ.

8 ივნისს, სენატის წინაშე ფედერალური ბიუროს ყოფილი ხელმღძვანელი ჯეიმს კომი წარსდგა. კომიმ, პრეზიდენტი დონალდ ტრამპი გამოძიების ფედერალური ბიუროს მიმართ ცილისწამებაში დაადანაშაულა. მისი თქმით, ტრამპის განცხადება იმის შესახებ, რომ FBI სამუშაოს შესაბამისად ვერ ასრულებს, ტყუილია. კომიმ სენატში განაცხადა, რომ პრეზიდენტი მას „კარგი მუშაობისთვის“ ხშირად აქებდა. FBI-ს ყოფილი უფროსი ფიქრობს, რომ მისი გადაყენებით ტრამპი შეცადა მისი რუსეთთან კავშირების შესახებ გამოძიების მიმდინარეობაზე გავლენა მოეხდინა.  

10 ივნისს, აშშ-ის პრეზიდენტმა დონალდ ტრამპმა კი განაცხადა, რომ ის "100%"-ით მზად არის ფიცის ქვეშ, FBI-ის ყოფილ ხელმძღვანელ ჯეიმს კომიზე, ჩვენება მისცეს. თეთრ სახლში პრესკონფერენციის დროს, მან უარყო, რომ კომის ერთგულება სთხოვა ან რუსეთთან დაკავშირებით გამოძიების შეწყვეტა მოსთხოვა. "კომიმ დაადასტურა ბევრი რამ, რაც მითქვამს, მაგრამ იყო ბევრი ტყუილიც", - განაცხადა აშშ-ის პრეზიდენტმა.