ჯეიმს კომი: ტრამპის თეთრი სახლი ტყუის

აშშ-ის გამოძიების ფედერალური ბიუროს (FBI) ყოფილი ხელმძღვანელის, ჯეიმს კომის მოსმენა სენატში რამდენიმე წუთის წინ დასრულდა. 

საუბრის დაწყებისთანავე კომიმ აღნიშნა, რომ მისი თანამდებობიდან გათავისუფლებასთან დაკავშირებით თეთრი სახლი ბევრ რამეს იტყუება. კერძოდ, საუბარია მისი მხრიდან ფედერალური ბიუროს მართვასთან დაკავშირებულ რიგ პრობლემებზე, რაც კომის გადაყენების ოფიციალურ მიზეზად დასახელდა.

ის დარწმუნებულია, რომ თანამდებობა სწორედ რუსეთსა და ტრამპის საარჩევო შტაბს შორის სავარაუდო კავშირის გამო დაკარგა. თუმცა კითხვაზე, გასცა თუ არა ტრამპმა რუსეთისა და აშშ-ის კავშირების შესახებ გამოძიების შეწყვეტის ბრძანება, კომიმ განაცხადა, რომ სიტყვა "ვბრძანებ" არ გაჟღერებულა. 

კომის განცხადებით, 14 თებერვალს ტრამპმა ნამდვილად სთხოვა გამოძიების შეწყვეტა უსაფრთხოების საკითხებში, თუმცა ხაზი გაუსვა იმას, რომ ტრამპის თხოვნა მხოლოდ მაიკლ ფლინს ეხებოდა, რომელიც დღემდე რუსეთთან ფარულ კავშირშია ეჭვმიტანილი.

კომი ასევე აცხადებს, რომ პრეზიდენტი მას ნაციონალური უსაფრთხოების საკითხებში ყოფილი მრჩევლის, მაიკლ ფლინის წინააღმდეგ საქმის გამოძიების შეწყვეტას მოითხოვდა, რომელიც აშშ-ში რუსეთის ელჩ სერგეი კისლიაკთან კონტაქტების დამალვაშია ეჭვმიტანილი. „იმედი მაქვს, თქვენ თავს დაანებებთ გამოძიებას და ფლინს, ის კარგი ბიჭია“, - ასე მიმართა ტრამპმა კომის. გამოძიების ფედერალური ბიუროს ყოფილი ხელმძღვანელი ტრამპთან 30 მარტს გამართულ სატელეფონო საუბარსაც იხსენებს, სადაც პრეზიდენტმა განაცხადა, რომ მისი რუსეთთან შესაძლო კავშირების შესახებ მიმდინარე გამოძიება „ღრუბელია“, რომელიც მას ქვეყნის მეთაურის რანგში მოქმედებებში უშლის ხელს.

პრეზიდენტმა ტრამპმა ჯეიმს კომი თანამდებობიდან 10 მაისს გადააყენა და განაცხადა, რომ ყოფილი ხელმძღვანელი ბიუროს ეფექტიანად მართვას ვერ ახერხებდა. 

ტრამპი აშშ-ის ისტორიაში მეორე პრეზიდენტია, ვინც FBI-ის უფროსი მოხსნა. 1993 წელს ბილ კლინტონმა ამ თანამდებობდან უილიამ სეშნსი გადააყენა.