დონალდ ტრამპი: მე რომ ახლა პრეზიდენტი ვყოფილიყავი, მსოფლიო დაინახავდა, რომ ავღანეთიდან ჩვენი გასვლა პირობების შესრულებაზე იქნებოდა დაფუძნებული - ეს ბევრად განსხვავებული და ბევრად უფრო წარმატებული გასვლა იქნებოდა

აშშ-ის ყოფილმა პრეზიდენტმა, დონალდ ტრამპმა ჯო ბაიდენი ავღანეთიდან აშშ-ის ჯარების პირობების წაყენების გარეშე გაყვანის გამო მკაცრად გააკრიტიკა.

დონალდ ტრამპმა განაცხადა, რომ მისი პრეზიდენტობის შემთხვევაში, ავღანეთიდან აშშ-ის ჯარების გაყვანა ბევრად განსხვავებული და ბევრად უფრო წარმატებული იქნებოდა.

„მე რომ ახლა პრეზიდენტი ვყოფილიყავი, მსოფლიო დაინახავდა, რომ ავღანეთიდან ჩვენი გასვლა პირობების შესრულებაზე იქნებოდა დაფუძნებული. მე პირადად ვესაუბრე „თალიბანის“ ლიდერებს. მათ გაიაზრეს, რომ ის, რასაც ისინი აკეთებენ, მიუღებელი იქნებოდა. ეს ბევრად განსხვავებული და ბევრად უფრო წარმატებული გასვლა იქნებოდა და თალიბებმა ეს ძალიან კარგად გაიგეს“, - აღნიშნა აშშ-ის 45-ე პრეზიდენტმა.

1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.

ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.

აშშ-ის პრეზიდენტმა, ჯო ბაიდენმა განაცხადა, რომ ავღანეთიდან ჯარების გაყვანის შესახებ გადაწყვეტილების მიღებას არ ნანობს.

„20 წლის განმავლობაში, ტრილიონი დოლარი დავხარჯეთ. 300 ათასზე მეტი ავღანელი სამხედრო გავწვრთნეთ და თანამედროვე აღჭურვილობა მივაწოდეთ. ავღანელი ლიდერები უნდა გაერთიანდნენ. ათასობით ადამიანი დავკარგეთ. მათ თავად უნდა იბრძოლონ. მათ თავიანთი ქვეყნისთვის უნდა იბრძოლონ“, - აღნიშნა ჯო ბაიდენმა.

ბოლო მონაცემებით, რადიკალურმა მოძრაობა „თალიბანმა“ ყანდაარი და ჰერათი აიღო. რადიკალური მოძრაობა „თალიბანი“ ავღანეთის ტერიტორიის 65%-ს აკონტროლებს.