ავღანეთში საკოორდინაციო საბჭო შეიქმნა

ავღანეთში საკოორდინაციო საბჭო შეიქმნა, რომლის შემადგენლობაშიც ეროვნული შერიგების უზენაესი საბჭოს თავმჯდომარე აბდულა აბდულა, ქვეყნის ყოფილი პრეზიდენტი ჰამიდ ქარზაი და ისლამური პარტიის ლიდერი გულბედინა ხეკმატიარა შევიდნენ. ამის შესახებ Deutshce Welle წერს.

ქარზაიმ Twitter-ზე დაწერა, რომ საბჭოს შექმნის მიზანი ქაოსის აღკვეთა, „ხალხის ტანჯვის შემცირება“ და ხელისუფლების მშვიდობიან გადაცემასთან დაკავშირებული საქმეების უკეთესი მართვაა.

ამასთან, „თალიბანის“ წარმომადგენელმა, ალხანაფი ვარდაკმა Twitter-ზე დაწერა, რომ დროებითი გარდამავალი ხელისუფლების შექმნა ავღანეთში არ იგეგმება.

15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა. ავღანეთის პრეზიდენტი აშრაფ ღანი ტაჯიკეთში გაიქცა.

ავღანეთის 34 პროვინციის ადმინისტრაციული ცენტრებიდან 23 უკვე „თალიბების“ ხელშია. ქვეყნის ძირითადი ქალაქებიდან დედაქალაქი ქაბული ახლა ერთადერთი ადგილია, რომელზეც მთავრობის კონტროლი ამ დრომდე ვრცელდებოდა, თუმცა, დედაქალაქის „თალიბების“ მიერ აღებას ჯერ არცერთი მხარე არ ადასტურებს. აღსანიშნავია, რომ, რამდენიმე საათის წინ, დაჯგუფებამ ნანგარჰარის პროვინციის დედაქალაქი, ჯალალაბადი აიღო და როგორც მედია წერს, დაჯგუფებას ამ ქალაქზე კონტროლის დასამყარებლად, ბრძოლაც კი არ დასჭირვებია.

ამერიკის პრეზიდენტის, ჯო ბაიდენის გადაწყვეტილებით, ავღანეთში, დამატებით, 1 000 სამხედრო გაიგზავნება.

1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.

ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.