კატარი არაბული ქვეყნების მიერ მისთვის საჰაერო სივრცის გახსნას არ ადასტურებს

ოფიციალური დოჰა არ ადასტურებს ინფორმაციას იმის შესახებ, რომ 4-მა არაბულმა ქვეყანამ კატარის ავიახაზებს გამოუვალი მდგომარეობის შემთხვევაში მათი საჰაერო სივრცით სარგებლობის უფლება მისცა. ინფორმაციას Reuters-ი ავრცელებს.

კატარის ტრანსპორტის სამინისტროში აცხადებენ, რომ არაბულმა ქვეყნებმა ცრუ ინფორმაცია გაავრცელეს, ამის მიზანი კი ორშაბათს მონრეალში დაგეგმილი ოფიციალური შეხვედრაა, რომელზეც ისინი საერთაშორისო სამოქალაქო საავიაციო სააგენტოს წარმომადგენლებს ხვდებიან.

ცოტა ხნის წინ გავრცელდა ინფორმაცია, რომ საუდის არაბეთი, ბაჰრეინი, ეგვიპტე და არაბთა გაერთიანებული საამიროები თანახმანი არიან კატარის ავიახაზებს, გამოუვალი მდგომარეობის შემთხვევაში, მათი საჰაერო სივრცის გამოყენების უფლება მისცენ. ნებართვის შესახებ ოფიციალური განცხადება საუდის არაბეთის საავიაციო ორგანომ გაავრცელა.

30 ივლისს ცნობილი გახდა არაბული ქვეყნების კატართან დიალოგის მზაობის შესახებ. 

23 ივნისს ქუვეითმა, შუამავლის სტატუსით, კატარს მოთხოვნების 13-პუნქტიანი სია გადასცა. ბაჰრეინი, საუდის არაბეთი, არაბთა გაერთიანებული საამიროები და ეგვიპტე კატარისგან ითხოვენ, გაწყვიტოს ირანთან კონტაქტი, დახუროს თურქული სამხედრო ბაზა და ასევე, ტელეკომპანია „ალ-ჯაზირა“, რომელსაც პროპაგანდის გავრცელებაში სდებენ ბრალს. ამ მოთხოვნების შესასრულებლად კატარს დრო 2 ივლისამდე მისცეს. თუმცა მოგვიანებით, კატარისთვის გაგზავნილ მოთხოვნათა 13-პუნქტიანი სიიდან, ხუთმა არაბულმა ქვეყანამ მოთხოვნები 6-მდე შეამცირა.

კატარის ხელისუფლებამ, სპარსეთის ყურის ქვეყნების მხრიდან წაყენებულ ულტიმატუმს არარეალური უწოდა. 

კატარის კრიზისი 5 ივნისს დაიწყო, როდესაც 6-მა არაბულმა ქვეყანამ (საუდის არაბეთი, არაბეთის გაერთიანებული საამიროები, ბაჰრეინი, ეგვიპტე, იემენი, ლიბია), მალდივის, მავრიკისა და მავრიტანიის რესპუბლიკამ, ტერორიზმის დაფინანსებისა და რეგიონში დესტაბილიზაციის მხარდაჭერის ბრალდებით, კატართან დიპლომატიური ურთიერთობა გაწყვიტა.