„თალიბანის“ მთავრობა აშშ-ის კონგრესს სანქციების შემსუბუქებასა და ავღანეთის აქტივების განბლოკვას სთხოვს

„თალიბანის“ მთავრობა აშშ-ის კონგრესს სანქციების შემსუბუქებასა და ავღანეთის აქტივების განბლოკვას სთხოვს.

„ამერიკულმა სანქციებმა არა მხოლოდ მიაყენა ზიანი ვაჭრობასა და ბიზნესს, არამედ ჰუმანიტარულ დახმარებასაც. ამჟამად ჩვენი ხალხის ფუნდამენტური გამოწვევა ფინანსური უსაფრთხოებაა და ამ შეშფოთების ფესვები ამერიკის მთავრობის მიერ ჩვენი ხალხის აქტივების გაყინვას უკავშირდება. აქტივების გაყინვამ და ეკონომიკურმა სანქციებმა შეიძლება ზიანი მიაყენოს ჯანდაცვის, განათლებისა და სხვა საჯარო სამსახურების სისტემებს“, - აღნიშნა „თალიბანის“ მთავრობის საგარეო საქმეთა მინისტრმა.

12 ნოემბერს, ჯანდაცვის მსოფლიო ორგანიზაციის წარმომადგენელმა განაცხადა, რომ კვების მწვავე უკმარისობის ფონზე, მილიონამდე ავღანელ ბავშვს სიკვდილის საფრთხე ემუქრება.

25 ოქტომბერს, გაეროს მსოფლიო სასურსათო პროგრამის ხელმძვანელმა, დევიდ ბიზლიმ განაცხადა, რომ მილიონობით ავღანელი, მათ შორის ბავშვები, შიმშილისგან შეიძლება დაიღუპოს, თუ გადაუდებელი ზომები არ იქნება მიღებული.

29 ოქტომბერს, „თალიბანის“ მთავრობამ ცენტრალური ბანკის რეზერვების მილიარდობით დოლარის განბლოკვა მოითხოვა, ვინაიდან ქვეყანა ფულადი სახსრების კრიზისის, მასობრივი შიმშილისა და ახალი მიგრაციის კრიზისის წინაშე დგას.

ავღანეთმა მილიარდობით დოლარის აქტივები აშშ-ის ფედერალურ სარეზერვო სისტემასა და ევროპის სხვა ცენტრალურ ბანკებში განათავსა, თუმცა აღნიშნული აქტივები მას შემდეგ გაიყინა, რაც აგვისტოში „თალიბანმა“ დასავლეთის მიერ მხარდაჭერილი მთავრობა დაამხო.