ჯო ბაიდენი იმედგაცრუებულია იმით, რომ აშშ-ის უზენაესმა სასამართლომ განკარგულება დაბლოკა, რომელიც მსხვილი კომპანიების თანამშრომლების სავალდებულო ვაქცინაციას ითვალისწინებდა

აშშ-ის პრეზიდენტი, ჯო ბაიდენი აცხადებს, რომ იმედგაცრუებულია იმით, რომ აშშ-ის უზენაესმა სასამართლომ განკარგულება დაბლოკა, რომელიც მსხვილი კომპანიების თანამშრომლების სავალდებულო ვაქცინაციას ითვალისწინებდა.

13 იანვარს, აშშ-ის უზენაესმა სასამართლომ დროებით დაბლოკა ჯო ბაიდენის ადმინისტრაციის განკარგულება, რომლის თანახმად, იმ კომპანიებს, სადაც 100-ზე მეტი ადამიანია დასაქმებული, პერსონალის ვაქცინაციის უზრუნველყოფა ევალებოდათ, წინააღმდეგ შემთხვევაში, ისინი ვალდებულნი იქნებოდნენ, კვირაში ერთხელ კორონავირუსზე ტესტი საკუთარი ხარჯებით ჩაეტარებინათ. ამასთან, აშშ-ის უზენაესმა სასამართლომ მხარი დაუჭირა სამედიცინო დაწესებულებების პერსონალისთვის ვაქცინაციის ჩატარების ვალდებულებას.

„იმედგაცრუებული ვარ, რომ უზენაესმა სასამართლომ გადაწყვიტა დაებლოკა სასიცოცხლოდ მნიშვნელოვანი მოთხოვნები მსხვილი კომპანიების თანამშრომლებისთვის, რომელიც ცალსახად ეფუძნებოდა როგორც მეცნიერებას, ასევე კანონს. ეს საგანგებო სტანდარტი დამსაქმებლებს საშუალებას აძლევდა მოეთხოვათ ვაქცინაცია ან დაეშვათ ვაქცინაციაზე უარის თქმა, თუ თანამშრომლები კვირაში ერთხელ ტესტირებას გაივლიდნენ და სამსახურში პირბადეს გამოიყენებდნენ. ეს ძალიან მოკრძალებული ტვირთია“, - აღნიშნა აშშ-ის პრეზიდენტმა.

აშშ-ის პრეზიდენტმა ბიზნესის წარმომადგენლებს მოუწოდა, დაუყოვნებლივ აღადგინონ სამუშაო ადგილებზე ვაქცინაციის მოთხოვნა.

„სასამართლოს გადაწყვეტილების შედეგად, ახლა შტატებმა და ცალკეულმა დამსაქმებლებმა თავად უნდა განსაზღვრონ, გახადონ თუ არა სამუშაო ადგილები მაქსიმალურად უსაფრთხო თანამშრომლებისთვის და იქნება თუ არა მათი ბიზნესი უსაფრთხო მომხმარებლებისთვის ამ პანდემიის დროს. სასამართლომ დაადგინა, რომ ჩემს ადმინისტრაციას არ შეუძლია გამოიყენოს კონგრესის მიერ მისთვის მინიჭებული უფლებამოსილება, რათა მოითხოვოს ეს ზომა, მაგრამ ეს არ მიშლის ხელს ჩემი ხმა გამოვიყენო, როგორც პრეზიდენტმა, რათა მხარი დავუჭირო დამსაქმებლებს, რომ ამერიკელების ჯანმრთელობა და ეკონომიკა დაიცვან. ბიზნესის წარმომადგენლებს მოვუწოდებ, ვაქცინაციის მოთხოვნები დააწესონ, რათა თავიანთი თანამშრომლები და მომხმარებლები დაიცვან“, - განაცხადა ჯო ბაიდენმა.