აშშ-ისა და იაპონიის მოსახლეობას ცუნამის შესახებ აფრთხილებენ და ურჩევენ, წყნარი ოკეანის სანაპიროებს მოშორდნენ

შეერთებულ შტატებსა და იაპონიაში მოსახლეობას მოსალოდნელი ძლიერი ცუნამის შესახებ აფრთხილებენ და მოუწოდებენ, თავი შეიკავონ წყნარი ოკეანის სანაპიროებზე გადაადგილებისგან, - ამის შესახებ BBC წერს.

ცუნამის გამომწვევ მიზეზად წყნარი ოკეანის სამხრეთ-დასავლეთ ნაწილში, პოლინეზიაში, ვულკან ჰუნგა ტონგას ამოფრქვევა სახელდება. ტონგას გეოლოგიურ სამსახურში აცხადებენ, რომ ვულკანიდან ამოფრქვეული გაზის, კვამლისა და ფერფლის ფენა ცაში 20 კილომეტრის სიმაღლეზე გავრცელდა.

იაპონიაში ვარაუდობენ, რომ სანაპიროებზე ტალღების სიმაღლე 3 მეტრს მიაღწევს, რაც წყალდიდობებს გამოიწვევს.

სანაპირო რაიონებში მცხოვრებთათვის, ფიჯის მთავრობამ ევაკუაციის ცენტრები გახსნა, მოსახლეობას საფრთხის შესახებ აფრთხილებენ ვანუატუზე, ავსტრალიის აღმოსავლეთ სანაპიროსა და ტასმანიაზეც.

ახალ ზელანდიაში, რომელიც ტონგადან 2,300 კმ-ზე მეტი მანძილითაა დაშორებული, საგანგებო სიტუაციების მართვის ეროვნულმა სააგენტომ განაცხადა, რომ ჩრდილოეთ და აღმოსავლეთ სანაპიროებზე „ძლიერი დინებები და არაპროგნოზირებადი ტალღებია“ მოსალოდნელი.

სოციალურ ქსელში გავრცელდა ვიდეოები, რომლებიც, ტონგაზე მომხდარი ამოფრქვევის შემდეგ, სანაპიროზე წარმოქმნილ ტალღებს ასახავს.

Tsunami videos out of Tonga 🇹🇴 this afternoon following the Volcano Eruption. pic.twitter.com/JTIcEdbpGe

— Jese Tuisinu (@JTuisinu) January 15, 2022