The New York Times: ჯო ბაიდენი ბალტიისპირეთსა და აღმოსავლეთ ევროპაში რამდენიმე ათასი ამერიკელი ჯარისკაცის, ასევე სამხედრო ხომალდებისა და თვითმფრინავების გაგზავნას განიხილავს

უკრაინაში რუსეთის შეჭრის მზარდი საფრთხის ფონზე, აშშ-ის პრეზიდენტი, ჯო ბაიდენი ბალტიისპირეთსა და აღმოსავლეთ ევროპაში რამდენიმე ათასი ამერიკელი ჯარისკაცის, ასევე სამხედრო ხომალდებისა და თვითმფრინავების გაგზავნას განიხილავს. ინფორმაციას ამის შესახებ გაზეთი The New York Times-ი აშშ-ის ადმინისტრაციაში წყაროებზე დაყრდნობით ავრცელებს.

გაზეთი The New York Times-ი წერს, რომ ეს ნაბიჯი ჯო ბაიდენის ადმინისტრაციისთვის გადამწყვეტი შემობრუნების მომენტი შეიძლება გახდეს, რომელიც ბოლო დრომდე უკრაინის მიმართ თავშეკავებულ პოზიციას იკავებდა, რუსეთის შეჭრის პროვოცირების შიშის გამო.

აშშ-ის ადმინისტრაციაში წყაროების ინფორმაციით, პენტაგონის მაღალჩინოსნებმა ჯო ბაიდენს აშშ-ის სამხედრო ძალების ევროპაში გადასროლის რამდენიმე ვარიანტი წარუდგინეს.

ერთ-ერთი ვარიანტი აღმოსავლეთ ევროპის ქვეყნებში 1 000-დან 5 000-მდე ჯარისკაცის გაგზავნას ითვალისწინებს. სიტუაციის გაუარესების შემთხვევაში, ეს რიცხვი შეიძლება გაათმაგდეს.

როგორც წყაროები იუწყებიან, ჯო ბაიდენი გადაწყვეტილებას, სავარაუდოდ, მიმდინარე კვირაში მიიღებს.