ტრამპმა ავღანეთთან დაკავშირებით ახალი სტრატეგია წარმოადგინა

აშშ-ის პრეზიდენტმა დონალდ ტრამპმა ავღანეთთან დაკავშირებით ახალი სტრატეგიის შესახებ ისაუბრა. სიტყვით გამოსვლისას ტრამპმა აღნიშნა, რომ მისი ადმინისტრაციის მიდგომაა ის, რომ ავღანეთი აღარ იყოს უსაფრთხო თავშესაფარი ისლამისტებისთვის, რომლებიც აშშ-ზე თავდასხმას აპირებენ. პრეზიდენტის სიტყვით გამოსვლის შესახებ Reuters-ი წერს.

„ჩვენი არმია გამარჯვებამდე იბრძოლებს,“- განაცხადა ტრამპმა ფორტ-მაიერის სამხედრო ბაზაზე გამოსვლისას. ამასთან, სახელმწიფოს მეთაურმა არ დააკონკრეტა, რამდენ ხანს დარჩებიან აშშ-ის შეიარაღებული ძალები ავღანეთში. მისი თქმით, ავღანეთში ტერორიზმთან ბრძოლის კუთხით სამხედრო ხელმძღვანელობის უფლებამოსილებები გაიზრდება.

აშშ-ის პრეზიდენტმა არაფერი თქვა იმის შესახებ, დამატებით რამდენი ამერიკელი ჯარისკაცი გაიგზავნება ავღანეთში. მანამდე არსებული ინფორმაციის მიხედვით, თავდაცვის მინისტრი ჯეიმს მეტისი კიდევ 4 ათასი ჯარისკაცის დამატებას გეგმავდა. ამჟამად ავღანეთში 8400 ამერიკელი სამხედრო იმყოფება.

დონალდ ტრამპმა პაკისტანის წინააღმდეგ შეერთებული შტატების პოზიცია გაამკაცრა. თეთრი სახლის ადმინისტრაციამ ოფიციალური ისლამაბადი გააფრთხილა, პაკისტანს უსაფრთხოების სფეროში დახმარებას შეუმცირებს, თუკი ქვეყნის ტერიტორიაზე ისლამისტების შეშვებას არ შეზღუდავს.

აშშ-ის პრეზიდენტმა დასძინა, რომ თეთრი სახლის სურვილია ინდოეთი ავღანეთს დაეხმაროს, განსაკუთრებით ეკონომიკის სფეროში. 

პრეზიდენტის მიერ ახალი სტრატეგიის გამოცხადების შემდეგ კომენტარი  თავდაცვის მდივანმაც გააკეთა, ჯეიმს მეტისმა აღნიშნა, რომ ამერიკის შეერთებული შტატები და  მისი მოკავშირეები მზად არიან ავღანეთში სამხედრო კონტინგენტი გაზარდონ.

19 აგვისტოს აშშ-ის პრეზიდენტმა დონალდ ტრამპმა განაცხადა, რომ რამდენიმე მნიშვნელოვანი გადაწყვეტილება მიიღო, მათ შორის ავღანეთთან დაკავშირებით, სადაც შეერთებული შტატები სამომავლო სტრატეგიაზე მუშაობს. „კემპ-დევიდში მნიშვნელოვანი შეხვედრა ჩავატარე ჩვენს ნიჭიერ გენერლებთან და სამხედრო ლიდერებთან ერთად. მივიღეთ ბევრი გადაწყვეტილება, მათ შორის ავღანეთთან დაკავშირებით“, - დაწერა ტრამპმა Twitter-ი. 

15 აგვისტოს, ავღანეთში მოქმედმა რადიკალურმა დაჯგუფება „თალიბანმა“ აშშ-ის პრეზიდენტს ღია წერილი გაუგზავნა, რომელშიც ტრამპს ავღანეთიდან ჯარის გაყვანისკენ მოუწოდებს. წერილში „თალიბანი“ ავღანეთში დისლოცირებულ კოალიციურ ძალებს ოკუპანტებად მოიხსენიებს და ქვეყანაში არსებულ ძალადობას სწორედ ამ ძალებს აბრალებს. 

აშშ ავღანეთში ანტიტერორისტულ ოპერაციას 2001 წლიდან ახორციელებს.