აშშ-ის კონგრესმა კრემლთან ტრამპის გუნდის პირდაპირი კონტაქტები დაადგინა

აშშ-ის წარმომადგენლობითი პალატის კომისიამ, რომელიც პრეზიდენტ ტრამპის რუსეთის ხელისუფლებასთან  კავშირებს იძიებს, მხარეებს შორის პირდაპირი კონტაქტის ფაქტი დაადგინა.

გაირკვა, რომ Trump Organization-ის ვიცეპრეზიდენტ მაიკლ კოენს პრეზიდენტ პუტინის პრესმდივანთან, დიმიტრი პესკოვთან მიმოწერა ჰქონდა იმ იმედით, რომ Moscow City-ში Trump Tower-ის მშენებლობაზე თანხმობას მიიღებდა, - წერს Washington Post.

Trump Organization-ი დეველოპერული ბიზნესით დაკავებული საერთაშორისო კონგლომერატია, რომელსაც ეკუთვნის უძრავი ქონება და გოლფის მოედნები აშშ-ში და კიდევ 10 ქვეყანაში, მათ შორის თურქეთში, ინდოეთში და არაბთა გაერთიანებულ საამიროებში. 2015 წელს კომპანიამ, ბიზნესის გეოგრაფიის გაფართოება და მოსკოვში Trump Tower-ის აშენება გადაწყვიტა. სწორედ ამ ეპიზოდით დაინტერესდა ამერიკის კონგრესი და კითხვებზე პასუხების მისაღებად ორგანიზაციის ვიცპრეზიდენტი მაიკლ კოენი კომისიაში დაიბარა.

კოენის თქმით, კოშკის რუსეთში აშენების თემა მან ტრამპთან სამჯერ განიხილა. 2015 წლის ოქტომბერში, რამდენიმე თვით ადრე, ვიდრე ტრამპი პრეზიდენტად საკუთარ კანდიდატურას წამოაყენებდა, კოენმა კოშკის არქიტექტურის და დიზაინის შემუშავებაზე წინადადება რუსული დეველოპერისგან ("ექსპერტი") მიიღო. შემდეგ მან პროექტის განხილვა დაიწყო ბიზნესმენ ფელიქს სატერთან რომელიც გარიგების შუამავლი უნდა გამხდარიყო. სატერი ამტკიცებდა, რომ მშენებლობაზე თანხმობის მიღება რუსეთის ხელისუფლებისგან იყო საჭირო.

"მე ჩავრთავ ამ საქმეში პუტინს, და ასე დავეხმარებით დონალდს გაპრეზიდენტებაში", - წერდა სატერი კოენს, მიუხედავად იმისა, რომ ის არ მონაწილეობდა ტრამპის კამპანიაში და მხოლოდ ბიზნესით იყო დაკავებული. "ჩვენი ბიჭი შეიძლება გახდეს აშშ-ის პრეზიდენტი, ჩვენ შევძლებთ ამის გაკეთებას. მე მივაღწევ იმას, რომ პუტინის მთელი გუნდი ჩვენ მხარეს დადგება", - აღნიშნავდა სატერი, რომელსაც ტრამპის გაპრეზიდენტების შემთხვევაში ბაჰამის კუნძულებზე აშშ-ის ელჩობა უნდოდა, მაგრამ საბოლოო ჯამში ეს თანამდებობა ვერ მიიღო.

იმავდროულად, სატერი ტრაბახობდა იმით, რომ 2006 წელს ტრამპის შვილ ივანკას კრელში ტური მოუწყო და მილიარდერის ქალიშვილი პუტინის პირად სავარძელშიც კი იჯდა. ივანკა ტრამპმა ჟურნალისტებს კრემლში ექსკურსიის ფაქტი დაუდასტურა, მაგრამ აღნიშნა, რომ ტურისტის რანგში მოგზაურობდა და პუტინის სავარძელში იჯდა თუ არა, არ ახსოვს.

რას პასუხობდა კოენი სატერს, კონრეტულად პუტინის შესაძლო მხარდაჭერაზე, ამის შესახებ პასუხები არც Post-ის და არც New york Times-ის სტატიებში არ არის. გაზეთებმა მიმოწერის ფრაგმენტები გამოაქვეყნეს. თუმცა აღნიშნავენ, რომ კოენი 2007 წლიდან ტრამპთან ძალიან დაახლოებული პირი იყო, მას დღევანდელი პრეზიდენტი ოჯახის წევრად განიხილავდა.

კოენმა კომისიაში მოყვა, რომ სატერი მას მუდმივად სთავაზობდა მოსკოვში ჩასვლას, მაგრამ ის უარს ეუბნებოდა. მისი თქმით, მოსკოვის Trump Tower-ის საქმე წინ არ მიიწევდა და საბოლოო ჯამში, 2016 წელს, მან დიმიტრი პესკოვს წერილი მისწერა, რომელიც კრემლის საერთო საფოსტო მისამართზე გააგზავნა და მას დახმარება სთხოვა. პესკოვს აღნიშნულ წერილზე კომენტარი ჯერ არ გაუკეთებია.

კოენი ამბობს, რომ არ ახსოვს მიიღო თუ არა პასუხი კრემლიდან და შეხვდა თუ არა რუს ჩინოსნებს. მისი თქმით, წერილის გაგზავნიდან რამდენიმე კვირაში პროექტი "ეკონომიკური მიზეზების გამო" დახურეს. კოენის სიტყვებზე Trump Organization-ში კიდევ ერთხელ განაცხადეს, რომ ორგანიზაციას რუსეთში ბიზნესინტერესები არასდროს გააჩნდა.

10 ივლისს დადასტურდა ინფორმაცია, რომ დონალდ ტრამპის შვილი, აშშ-ის საპრეზიდენტო არჩევნებამდე რამდენიმე თვით ადრე, შეხვდა რუს იურისტს, რომელიც დემოკრატ კანდიდატზე, ჰილარი კლინტონზე კომპრომატების გადაცემას დაჰპირდა. თუმცა, საგამოძიებო კომისიას ვერც ამ ფაქტმა მისცა უფრო სერიოზული ბრალდებების წაყენების საფუძველი მოქმედი პრეზიდენტის მიმართ.