პედრო სანჩესი: ნატოს მადრიდის სამიტზე განვსაზღვრავთ იმ საფრთხეებს, რომელთა წინაშეც ახლა ვართ და ვიქნებით მომავალში

ამ სამიტზე ჩვენ განვსაზღვრავთ იმ საფრთხეებს, რომლის წინაშეც ახლა ვართ და ვიქნებით მომავალში. ასევე განვსაზღვრავთ ​სპეციფიკურად იმ რესურსებს, რომელიც გვაქვს ამ საფრთხეებისთვის წინააღმდეგობის გასაწევად და როგორ გამოვიყენებთ მათ. ამასთან, მოვახდენთ ალიანსის კონსოლიდაციას. პუტინის უკრაინაში შეჭრის შემდეგ გამოჩნდა, რა დიდი მნიშვნელობა აქვს ამას ახლა და მომავალშიც, - ეს განცხადება ესპანეთის პრემიერ-მინისტრმა პედრო სანჩესმა ნატოს მადრიდის სამიტის დაწყებამდე პრესკონფერენციაზე გააკეთა.

„მივიღებთ ახალ სტრატეგიულ კონცეფციას ნატოსთვის, რომელიც განსაზღვრავს მომდევნო 10 წელიწადში ნატოს ქმედებებს და მას მადრიდის სახელი ერქმევა, რაც მნიშვნელოვანია ესპანეთისთვის. ველოდებით, როგორ დასრულდება ნატოს გენერალური მდივნის მოლაპარაკებები ახალი წევრების, ფინეთისა და შვედეთის ალიანსში გაწევრიანების საკითხზე. ვუსურვებთ გენერალურ მდივანს წარმატებას.

ჩვენ დარწმუნებული ვართ, რომ ეს დღეს თუ არ მოხდება, მაშინ მოხდება მოგვიანებით და ისინი გახდებიან ნატოს წევრები. და მესამე, მნიშვნელოვანია ჩვენთვის, რომ ვხდებით ნატო-ს ახალი სტრატეგიის მონაწილეები. ეს არის ძალიან მნიშვნელოვანი ევროპის სამხრეთისთვის. ეს არის სტრატეგია 360 გრადუსი, რაც მოიცავს სამხრეთ ფლანგს, როგორც ელემენტს, რომ ჩვენ უნდა ვიყოთ ფოკუსირებული მომდევნო თვეებში“, - განაცხადა პედრო სანჩესმა.

მადრიდის სამიტი თბილისის დროით 17: 20 წუთზე გაიხსნება. მანამდე ნატოს გენერალური მდივნისა და ესპანეთის მთავრობის პრეზიდენტის ერთობლივი პრესკონფერენცია გაიმართება. იენს სტოლტენბერგმა საქართველოსთვის დახმარების ახალი პაკეტის დამტკიცება დააანონსა, თუმცა ჯერ კონკრეტული დეტალები უცნობია.

მადრიდის სამიტში მონაწილეობას პრემიერ-მინისტრი ირაკლი ღარიბაშვილი მიიღებს.