იენს სტოლტენბერგი: უკრაინა გახდება ალიანსის წევრი, ნატოში გაწევრიანებისკენ პირველი ნაბიჯი კი ამ ომში უკრაინის გამარჯვების უზრუნველყოფაა

ნატოს პოზიცია უცვლელი რჩება უკრაინის მომავალ წევრობაზე. ამ პოზიციის თანახმად, უკრაინა გახდება ალიანსის წევრი, - ამის შესახებ ნატოს გენერალურმა მდივანმა იენს სტოლტენბერგმა განაცხადა.

მისი თქმით, ნატოში გაწევრიანებისკენ პირველი ნაბიჯი კი უკრაინის ომში გამარჯვების უზრუნველყოფაა.

„ამავდროულად, თქვენ ყველას უნდა გესმოდეთ, რომ ახლა მთავარი აქცენტი მდგომარეობს იმაში, რომ უკრაინა იყოს სუვერენული, დამოუკიდებელი ქვეყანა ევროპაში. რადგან უკრაინის, როგორც სუვერენული დამოუკიდებელი სახელმწიფოს გარეშე, რა თქმა უნდა, ნატოში წევრობის საკითხი არ იქნება აქტუალური. ასე რომ, პირველი ნაბიჯი უკრაინის ნატოში გაწევრიანებისკენ არის ამ ომში უკრაინის გამარჯვების უზრუნველყოფა. ეს არის მიზეზი, რის გამოც ნატოს მოკავშირეებმა და პარტნიორებმა უპრეცედენტო მხარდაჭერა გამოუცხადეს უკრაინას და რატომ ვაგრძელებთ უკრაინის დახმარებას. ხვალინდელ შეხვედრაზე კიდევ ერთხელ მოვუწოდებთ მოკავშირეებს, გააძლიერონ უკრაინის მხარდაჭერა სამხედრო თვალსაზრისით, ლეტალური, არალეტალური. მაგრამ ასევე, რა თქმა უნდა, უკრაინის ეკონომიკური და ფინანსური მხარდაჭერაა აუცილებელი. ასე რომ, ეს არის პირველი და ყველაზე გადაუდებელი და ყველაზე მნიშვნელოვანი ნაბიჯი.

მეორე არის ის, რომ ჩვენ ასევე განვიხილავთ, თუ როგორ შეიძლება განვავითაროთ ჩვენი პოლიტიკური ურთიერთობა უკრაინასთან და გვაქვს იდეები იმის შესახებ, თუ როგორ შეგვიძლია გავაფართოოთ მუშაობა უფრო გრძელვადიან რეფორმებზე, უკრაინაში ინსტიტუტების მშენებლობაზე. ნატოს სტანდარტები, თავსებადობა - რა თქმა უნდა, ეს ყველაფერი ხელს უწყობს უკრაინის ევროატლანტიკურ ინტეგრაციას და ნატოს ოჯახთან დაახლოებას. ასე რომ, ეს ყველაფერი უკვე ურთიერთდაკავშირებულია. ზუსტ თარიღს ვერ გეტყვით. მაგრამ მე შემიძლია ვთქვა, რომ მოკავშირეები უკიდურესად არიან ორიენტირებულნი უკრაინის გამარჯვების უზრუნველსაყოფად. ჩვენ უკრაინას ვთავაზობთ უპრეცედენტო დონის მხარდაჭერას და განვიხილავთ, თუ როგორ განვავითაროთ ჩვენი პოლიტიკური ურთიერთობა. ნატოსთვის ძალზე მნიშვნელოვანია იმის დემონსტრირება, რომ ნატოს კარი ღია რჩება, როგორც ამას გავაკეთებთ ხვალ, როცა ფინეთი გახდება სრულუფლებიანი წევრი, როგორც ამას გავაკეთებთ, როდესაც შვედეთის გაწევრიანების პროცესს დავასრულებთ, იმედია უახლოეს მომავალში შვედეთიც გახდება ნატოს წევრი“, - განაცხადა სტოლტენბერგმა.