ევროკომისიის პრეზიდენტი: ჩვენი ჰუმანიტარული მხარდაჭერა პალესტინელი ხალხისადმი კითხვის ნიშნის ქვეშ არ დგას, თუმცა ევროკავშირის დაფინანსება არასოდეს წავა „ჰამასთან“, ან რომელიმე ტერორისტულ ორგანიზაციასთან

ჩვენი ჰუმანიტარული მხარდაჭერა პალესტინელი ხალხისადმი კითხვის ნიშნის ქვეშ არ დგას. თუმცა მნიშვნელოვანია, ყურადღებით გადავხედოთ ჩვენს ფინანსურ დახმარებას, რაც პალესტინისთვისაა განკუთვნილი. ევროკავშირის დაფინანსება არასოდეს წავა „ჰამასთან“, ან რომელიმე ტერორისტულ ორგანიზაციასთან, - ამის შესახებ ევროკომისიის პრეზიდენტმა ურსულა ფონ დერ ლაიენმა ბრიუსელში განაცხადა, სადაც ნატოს მინისტერიალი იმართება.

„შაბათს გამთენიისას მთელმა მსოფლიომ საშინელი ამბით გაიღვიძა. ასობით უდანაშაულო ადამიანი ცივსისხლიანად მოკლეს. „ჰამასის“ ტერორისტები საკუთარ სახლებში ხოცავდნენ ქალებსა და ბავშვებს. ისინი ნადირობდნენ ასობით ახალგაზრდა კაცსა და ქალზე, რომლებიც ზეიმობდნენ ცხოვრებას, სიცოცხლეს და მუსიკას. მათ მძევლად აიყვანეს ასობით უდანაშაულო პირი, რომელთა ბედი დღემდე უცნობია. ეს უდანაშაულო ადამიანები მოკლეს ერთი მიზეზის გამო - ებრაელობისთვის და ისრაელის სახელმწიფოში ცხოვრებისთვის. ეს არის ბოროტება, რომელიც გვახსენებს ყველაზე ბნელ წარსულს და შოკში გვაგდებს ყველას.

ჩვენ მკაფიოდ და ნათლად უნდა ვთქვათ ამგვარ საშინელებაზე ჩვენი სათქმელი და მკაფიო ვიყოთ შეფასებებში. ეს არის ტერორიზმი და ეს არის ომის აქტი. ეს იყო ყველაზე საშინელი თავდასხმა ისრაელზე, ისრაელში სახელმწიფოს შექმნის შემდეგ. ამ საზარელ აქტზე მხოლოდ ერთი პასუხი შეიძლება იყოს - ევროპა ისრაელის გვერდით დგას. ჩვენ სრულად ვუჭერთ მხარს ისრაელის უფლებას, დაიცვას საკუთარი თავი. მე ველაპარაკე პრეზიდენტს და გადავეცი ჩემი სრული მხარდაჭერა. ევროკომისია განათდა ისრაელის დროშის ფერებში. ეს არის ტრაგედია ისრაელისთვის, ებრაელი ხალხისთვის და ასევე ევროპისთვის.

არ შეიძლება „ჰამასის“ ტერორისტული აქტი გამართლდეს. ამას არანაირი კავშირი არ აქვს პალესტინელი ხალხის ლეგიტიმურ მისწრაფებებთან. საშინელებაა ის, რაც „ჰამასმა“ გააჩაღა, უფრო მეტ ტანჯვას მოუტანს უდანაშაულო პალესტინელებს.

მხოლოდ „ჰამასი“ არის პასუხისმგებელი ამ ქმედებებზე. ჩვენი ჰუმანიტარული მხარდაჭერა პალესტინელი ხალხისადმი კითხვის ნიშნის ქვეშ არ დგას. თუმცა მნიშვნელოვანია, რომ ჩვენ ყურადღებით გადავხედოთ ჩვენს ფინანსურ დახმარებას, რაც პალესტინისთვისაა განკუთვნილი. ევროკავშირის დაფინანსება არასოდეს წავა „ჰამასთან“, ან რომელიმე ტერორისტულ ორგანიზაციასთან. არსებული ვითარება დიდ გავლენას მოახდენს რეგიონზე.

ჩვენ მოგვიწევს მუშაობა რეგიონის დესტაბილიზაციის ნიშნების შესაჩერებლად. ასევე მოგვიწევს ყურადღებით დავაკვირდეთ ირანის პოზიციას „ჰამასისადმი“ გრძელვადიანი მხარდაჭერის გათვალისწინებით. უახლოეს დღეებში ჩვენ უნდა ვიყოთ ერთიანნი და კოორდინირებული, მაგრამ ჩემი გზავნილი ნათელია - ევროპა ისრაელის გვერდით დგას. ევროპა დგას ჩვენს მეგობართან და პარტნიორთან“, - აღნიშნა ევროკომისიის პრეზიდენტმა.

ბრიუსელში ნატოს მინისტერიალი იმართება. ალიანსის წევრი ქვეყნების თავდაცვის მინისტრები უკრაინისთვის მხარდაჭერის გაძლიერებასთან ერთად, ისრაელში განვითარებულ მოვლენებს განიხილავენ. ნატო გმობს ტერორისტულ აქტებს.