მსოფლიო ელიტის ოფშორულ საქმიანობაზე ახალი ჟურნალისტური გამოძიება ჩატარდა

გამოქვეყნდა ახალი დოკუმენტები Paradise Papers, რომლებშიც ოფშორში რეგისტრირებულ კომპანიებზე მსოფლიოს წამყვანი პოლიტიკოსების, კომპანიებისა და ცნობილი ადამიანების მიერ გადარიცხული თანხების შესახებ წერია. 

დოკუმენტების მიხედვით, ეს ადამიანები თუ კომპანიები გადასახადების დამალვით, მილიონობით დოლარს რიცხავდნენ ოფშორში.

Paradise Papers-ი 13.4 მილიონ ფაილს შეიცავს, რომლებიც ხელში ჩაუვარდა გერმანულ გაზეთს Süddeutsche Zeitung-ს. გაზეთმა დოკუმენტები ჟურნალისტური გამოძიების საერთაშორისო კონსორციუმს გაუზიარა, რომელთა პარტნიორებიც არიან The Guardian-ი, BBC და The New York Times-ი.

Paradise Papers-ის მიხედვით ირკვევა, რომ :

• დედოფალ ელისაბედ მეორის კერძო ქონებიდან მილიონობით ფუნტი სტერლინგი კაიმანის კუნძულების ფონდში გადაირიცხა, რომელიც ოფშორშია რეგისტრირებული;
• ოფშორულ გარიგებებში მონაწილეობენ აშშ-ის პრეზიდენტ დონალდ ტრამპის მრჩევლები, მინისტრთა კაბინეტის წევრები და დონორები; ასევე დადგინდა კავშირი ტრამპის ბიზნესის კომერციული მდივნის უილბორ როსისა და ვლადიმერ პუტინის სიძის კომპანიებს შორის;
• Twitter-მა და Facebook-მა ასობით მილიონი დოლარი მიიღეს ინვესტიციების სახით, რომლებიც შეიძლება უკავშირდებოდეს რუსეთის სახელმწიფო ფინანსურ ინსტიტუტებს;

და სხვა მრავალი ინფორმაცია, რომელიც გადასახადებისგან თავის არიდების მიზნით ოფშორში ფულის გადარიცხვას შეეხება.

2016 წელს გავრცელდა პანამის დოკუმენტები, რომლებიც ამ შინაარსის მასალებს შეიცავდა. პანამის დოკუმენტები - ჟურნალისტური გამოძიების საერთაშორისო კონსორციუმმა Mossack Fonseca-ს სერვერიდან აღებული 2,6 ტერაბაიტის მოცულობის დოკუმენტაცია 2016 წლის გაზაფხულზე გამოაქვეყნა. დოკუმენტები შეიცავდა ინფორმაციას ოფშორული კომპანიების შესახებ, რომლებსაც ქვეყნების მოქმედი და ყოფილი ლიდერები, პოლიტიკოსები, ცნობილი ადამიანები და სპორტსმენები იყენებდნენ.