"სამოთხის დოკუმენტები": აშშ-ის ვაჭრობის მინისტრი რუსულ კომპანიაში ინვესტიციებს დებდა

"სამოთხის დოკუმენტები" (Paradise Papers) აშშ-ის ვაჭრობის მინისტრ ვილბურ როსს რუსეთის ნავთობისა და გაზის კორპორაციებთან კავშირში ამხელს. ამის შესახებ BBC ცოტა ხნის წინ გავრცელებულ დოკუმენტებზე დაყრდნობით წერს.

დოკუმენტებში წერია, რომ როსი წარმოადგენს იმ სავაჭრო გადაზიდვების კომპანიის ინტერესებს, რომელიც მილიონობით დოლარს რუსული გაზისა და ნავთობის გადაზიდვით გამოიმუშავებდა ყოველწლიურად. ამ კომპანიის ერთ-ერთი მთავარი აქციონერი კი რუსეთის პრეზიდენტის - ვლადიმერ პუტინის სიძე და კიდევ ორი პირია, რომლებიც აშშ-ის მიერ რუსეთისთვის დაწესებული ეკონომიკური სანქციების სიათა ჩამონათვალში არიან მითითებულნი. დოკუმენტების მიხედვით, როსი ამ კომპანიაში ინვესტიციებს დებდა.

Paradise Papers-ი 13.4 მილიონ ფაილს შეიცავს, რომლებიც ხელში ჩაუვარდა გერმანულ გაზეთს Süddeutsche Zeitung-ს. გაზეთმა დოკუმენტები ჟურნალისტური გამოძიების საერთაშორისო კონსორციუმს გაუზიარა, რომელთა პარტნიორებიც არიან The Guardian-ი, BBC და The New York Times-ი. დოკუმენტებში საუბარია ოფშორში რეგისტრირებულ კომპანიებზე, რომლებშიც მსოფლიოს წამყვანი პოლიტიკოსები, კომპანიები და ცნობილი ადამიანები თავიანთ ფინანსებს ინახავდნენ.