აშშ მსოფლიოს მოუწოდებს ჩრდილოეთ კორეასთან კავშირი გაწყვიტონ

გაეროში აშშ-ის მუდმივმა წარმომადგენელმა ნიკი ჰეილიმ ყველა სახელმწიფოს მოუწოდა გაწყვიტონ ჩრდილოეთ კორეასთან ნებისმიერი სახის ურთიერთობა. ამის შესახებ Reuters-ის ცნობით, მან გაეროს უშიშროების საბჭოს საგანგებო სხდომაზე განაცხადა. ჰეილიმ განმარტა, რომ მისი წინადადება ეხება სავაჭრო ურთიერთობებს, ექსპორტ-იმპორტს. მან ასევე მოუწოდა სახელმწიფოებს  ჩრდილოეთკორეელი მუშახელი გააძევონ ქვეყნიდან. ამასთან, აშშ მიიჩნევს, რომ ჩრდილოეთ კორეას გაეროში ყველა უფლება და პრივილეგია უნდა ჩამოართვან, მათ შორის ხმის უფლება. 

გაეროში ამერიკის შეერთებული შტატების ელჩის თქმით, მორიგი ბალისტიკური რაკეტის გაშვებით  ჩრდილოეთ კორეის ლიდერმა საკუთარი არჩევანი გააკეთა, რის შედეგადაც მსოფლიო საომარ ვითარებას  იუახლოვდა. „ჩვენ არასდროს ვცდილობდით ჩრდილოეთ კორეასთან ომს, თუმცა ომის შემთხვევაში, უდაოა, რომ  ჩრდილოეთ კორეის რეჟიმი სრულად განადგურდება,"- განაცხადა ჰეილიმ.

გაეროს უშიშროების საბჭოს მას შემდეგ მოიწვიეს, რაც ჩრდილოეთ კორეამ მორიგი ბალისტიკური რაკეტა გამოსცადა. ცნობა იმის შესახებ, რომ ჩრდილოეთ კორეამ ბალისტიკური რაკეტა გაუშვა, 28 ნოემბერს გავრცელდა. იაპონიის ხელისუფლება აცხადებს, რომ რაკეტა აპონიის სანაპიროდან 210 კილომეტრის მოშორებით ჩამოვარდა.

12 სექტემბერს გაეროს უშიშროების საბჭომ, ჩრდილოეთ კორეის წინააღმდეგ ახალი სანქციების ამოქმედებაზე რეზოლუცია მიიღო. დოკუმენტს საბჭოს წევრებმა ერთხმად დაუჭირეს მხარი, მათ შორის ჩინეთმა და რუსეთმაც.

3 სექტემბერს ჩრდილოეთ კორეამ განაცხადა, რომ წარმატებით გამოსცადა წყალბადის ბომბი, რომლის დამაგრებაც შორ მანძილზე მოქმედ კონტინენტთაშორის ბალისტიკურ რაკეტაზე შეიძლება. იაპონელი სეისმოლოგების ინფორმაციით, მიწისქვეშა აფეთქების სიმძლავრე 160 კილოტონა იყო. კიმ ჩენ ინის თქმით, მეექსვსე ბირთვული ცდა ჩრდილოკორეელი ხალხის დიდი გამარჯვებაა.