პალესტინა ისლამურ ქვეყნებს ისრაელის და აშშ-ს პროდუქციის ბოიკოტისკენ მოუწოდებს

პალესტინის ავტონომიის პრეზიდენტის მაჰმუდ აბასის უფროსმა თანაშემწემ მუსლიმურ ქვეყნებს მოუწოდა აშშ-ის და ისრაელის პროდუქციას ბოიკოტი გამოუცხადონ. ამის შესახებ სააგენტო Anadolu იუწყება. 

„მანამ, სანამ ისრაელის საერთაშორისო სამართლის შესაბამისად არ იმოქმედებს, ჩვენ მოვუწოდებთ ისლამურ სახელმწიფოებს ისრაელის წარმოების პროდუქტები დაბლოკონ,“- განაცხადა მაჰმუდ სიდკი ალ-ჰაბაშმა.

მისივე თქმით, აშშ-ის მიერ იერუსალიმის ისრაელის დედაქალაქად გამოცხადების შემდეგ, ეს ბოიკოტი ამერიკასაც ეხება. „აშშ და ისრაელი ერთ მხარეს არიან. ეს ისლამური საზოგადოების ინტერესების წინააღმდეგაა მიმართული,“- განაცხადა ალ-ჰაბაშმა. 

6 დეკემბერს აშშ-ის პრეზიდენტმა განაცხადა, რომ ვაშინგტონი იერუსალიმს ისრაელის დედაქალაქად ოფიციალურად აღიარებს. ამასთან, დონალდ ტრამპმა აღნიშნა, რომ ისრაელში აშშ-ის საელჩო თელ-ავივიდან იერუსალიმში გადაინაცვლებს.

ტრამპის გადაწყვეტილებას ღაზის სექტორში საპროტესტო აქციები მოჰყვა, რომლის შედეგადაც ერთი ადამიანი დაიღუპა და 230 დაშავდა.  რადიკალური გაერთიანება „ჰამასი“, რომელსაც ისრაელი და აშშ ტერორისტულ ორგანიზაციად აცხადებს, ისრაელს ომით დაემუქრა.

13 დეკემბერს, ისლამური თანამშრომლობის ორგანიზაციამ აღმოსავლეთ იერუსალიმი პალესტინის დედაქალაქად აღიარა. ამის შესახებ საუბარია რეზოლუციაში, რომელიც ორგანიზაციის საგანგებო სამიტზე მიიღეს.