მედია: მაიკ პენსის ვიზიტი ისრაელში გადაიდო

აშშ-ის ვიცეპრეზიდენტმა მაიკ პენსმა ისრაელში დაგეგმილი ვიზიტი გადადო, რომელიც 17-18 დეკემბერს უნდა გამართულიყო. ამის შესახებ პორტალი Walla ისრაელის დიპლომატიური უწყებების წყაროზე დაყრდნობით წერს. როგორც გამოცემა წერს, ვიზიტი იმის გამო გადაიდო, რომ კონგრესში მიმდინარე განხილვებისას პენსის დასწრებაა საჭირო. 

„ისრაელის დიპლომატიური წყაროების ცნობით, ვიზიტის გადადების თხოვნა თეთრი სახლიდან მოდიოდა, რომელიც კონგრესში კენჭისყრებს უკავშირდება. ვიზიტი, სავარაუდოდ, რამდენიმე დღით დაგვიანებით გაიმართება“, - ნათქვამია ინფორმაციაში. 

ისრაელის პარლამენტის ოფიციალურმა წარმომადგენელმა იოთამ იაკირმა დაადასტურა, რომ პენსის ქნესეთში გამოსვლა  გადაიდო. თუმცა არც თელ-ავივში აშშ-ში საელჩოში და არც ისრაელის პრემიერმინისტრის კანცელარიაში ამ ინფორმაციაზე კომენტარს არ აკეთებენ.

6 დეკემბერს აშშ-ის პრეზიდენტმა განაცხადა, რომ ვაშინგტონი იერუსალიმს ისრაელის დედაქალაქად ოფიციალურად აღიარებს. ამასთან, დონალდ ტრამპმა აღნიშნა, რომ ისრაელში აშშ-ის საელჩო თელ-ავივიდან იერუსალიმში გადაინაცვლებს.

ტრამპის გადაწყვეტილებას ღაზის სექტორში საპროტესტო აქციები მოჰყვა, რომლის შედეგადაც ერთი ადამიანი დაიღუპა და 230 დაშავდა.  რადიკალური გაერთიანება „ჰამასი“, რომელსაც ისრაელი და აშშ ტერორისტულ ორგანიზაციად აცხადებს, ისრაელს ომით დაემუქრა.

13 დეკემბერს, ისლამური თანამშრომლობის ორგანიზაციამ აღმოსავლეთ იერუსალიმი პალესტინის დედაქალაქად აღიარა. ამის შესახებ საუბარია რეზოლუციაში, რომელიც ორგანიზაციის საგანგებო სამიტზე მიიღეს.