Bloomberg: უახლოესი 10 წლის ყველაზე საშიში მოვლენები

ეკონომიკური გამოცემა Bloomberg-ი ყოველწლიურად აქვეყნებს ეგრეთ წოდებულ "პესიმისტის გიდს" - ყველაზე უსიამოვნო მოვლენების ჩამონათვალს, რომლებიც შეიძლება უახლოეს მომავალში მოხდეს. ამჯერად პროგნოზი მომავალ 10 წელს მოიცავს.

დონალდ ტრამპს მეორე ვადით აირჩევენ

თეთრი სახლის საგადასახადო რეფორმას სერიოზული ეკონომიკური ზრდა მოჰყვება, რუსეთის არჩევნებში ჩარევის საქმის გამოძიება არაფრით დასრულდება. ტრამპი უმნიშვნელო უპირატესობით გაიმარჯვებს არჩევნებში მეორე ვადით და შეასრულებს დაპირებას სამედიცინო დაზღვევის გაუქმებაზე, თუმცა მას ვერაფრით ჩაანაცვლებს. დაიწყება კრიზისი და 2024 წლის არჩევნებს მოიგებს დემოკრატი ტელეწამყვანი ჯიმი კიმელი. შემდეგ ოთხ წელიწადში რესპუბლიკური და დემოკრატიული პარტიები საბოლოოდ დაიშლებიან. არჩევნებზე 4 კანდიდატი იქნება წარდგენილი, მაგრამ ვერცერთი ვერ მიიღებს გამარჯვებისთვის აუცილებელი ხმების რაოდენობას. დაიწყება მასშტაბური პოლიტიკური კრიზისი.   

ფეისბუკი ყალბ ახალ ამბებთან ბრძოლაში დამარცხდება

ბევრი ქვეყნის მთავრობა რუსეთის მაგალითს მიბაძავს და შექმნის "ტროლების ფაბრიკებს". ტვიტერის ტრაფიკის ნახევარს მოიცავს ბოტები და ექაუნთები ყალბი ახალი ამბებით. მსხვილი ჰაკერული თავდასხმის შემდეგ ხმოვანი თანაშემწეები მომხმარებლებს ტრამპის მხარდაჭერისკენ მოუწოდებენ. ადამიანები ვეღარ გაარჩევენ ერთმანეთისგან ტყუილს და სიმართლეს; ფეისბუკი და ტვიტერი დღევანდელი სახით აღარ იარსებებენ.

ბიტკოინი შეცვლის ბანკებს

უკვე 2018 წლისთვის, ჰაკერული თავდასხმების მიმართ ბანკების მოწყვლადობის გამო, ბიტკოინის ფასი 40 ათას დოლარამდე გაიზრდება. 2012 წლისთვის ის 100 ათას დოლარს მიაღწევს; ბიტკოინით ვაჭრობაზე გადავლენ საბერძნეთი და რამდენიმე აფრიკული ქვეყანა. 2028 წლისთვის, საბანკო სისტემა დღევანდელი სახით აღარ იარსებებს, ხოლო მსხვილი ინტერნეტ-სერვისები ივაჭრებენ ბიტკოინით, რომლის ფასიც მილიონ დოლარს გადააჭარბებს.

კიმ ჩენ ინი მოკვდება

ჩრდილოეთ კორეა გაუშვებს რაკეტას, რომელიც აშშ-ის სანაპიროებთან 20 კილომეტრში ჩავარდება. ტრამპი გადაწყვეტს რომ კონფლიქტის გამწვავება არ ღირს და ფხენიანს არ უპასუხებს. 2019 წელს კიმ ჩენ ინი გულის შეტევისგან მოკვდება, ახალი მთავრობა კი ბირთვულ პროგარამაზე უარს იტყვის. ჩინეთი აშშ-ს დაუმეგობრდება და ტრამპის ხელშეწყობით ტაივანს დააბრუნებს. ამ ფონზე იაპონია დაიწყებს ბირთვულ იარაღზე მუშაობას და 2028 წლისთვის ბირთვული სახელმწიფო გახდება.

ბრიტანეთის ხელისუფლებაში სოციალისტები მოვლენ

ბრიტანეთის ევროკავშირიდან გასვლის მოლაპარაკებები ჩაიშლება, რაც ტერეზა მეის თანამდებობის ფასად დაუჯდება. მას ლეიბორისტების ლიდერი, გულმხურვალე სოციალისტი ჯერემი კორბინი შეცვლის. განათლება გახდება უფასო, კორბინის რეფორმები კი - ძალიან პოპულარული, მაგრამ ბიუჯეტს მნიშვნელოვან დარტყმას მიაყენებს. 2028 წლისთვის დიდი ბრიტანეთის დეფოლტის საფრთხე გახდება რეალური.

ელექტრომანქანები ნავთობზე დამოკიდებულებას დაამარცხებენ. პუტინი გადადგება

უკვე 2018 წელს დასატენი ბატარეები ძალიან ეფექტიანი გახდება, ხოლო ელექტრომობილები - პოპულარული, რის გამოც "ოპეკი" ნავთობის მოპოვებას შეამცირებს, რომ მისი ღირებულება ერთ ბარელზე 50 დოლარზე მეტად არ შემცირდეს. ამის მიუხედავად, 2021 წლისთვის ნავთობის ფასი 20 დოლარამდე დაეცემა, რაც აშშ-ის და იაპონიის ეკონომიკებისთვის იქნება შოკი, რადგან ჩვეულებრივ ავტომობილებზე მოთხოვნა მკვეთრად შემცირდება. რუსეთში ნავთობის ქარხნებში დაიწყება ამბოხებები, ვლადიმერ პუტინი პრეზიდენტის თანამდებობიდან გადადგება და თავის ნაცვლად დატოვებს "ცენტრობანკის" ხელმძღვანელ ელვირ ნაბიულინს. 2028 წლისთვის პუტინი საერთოდ გაქრება საზოგადოებრივი ცხოვრებიდან, ნაბიულინს კი მოუწევს ქვეყნის დაშლის წინააღმდეგ ბრძოლა. ნავთობის ფასი იქნება 10 დოლარი, "ოპეკი" დაიშლება, ნავთობის ინდუსტრიაში მსხვილი კომპანიები გაკოტრდებიან.

ჩინეთი დიდ სავაჭრო ომს გააჩაღებს

კლიმატური პირობების გამო ჩინეთში მდინარეები დაშრობას დაიწყებს. ის შემოიღებს სანქციებს იმ ქვეყნების მიმართ, რომლებმაც პეკინის აზრით, ყველაზე დიდი ზიანი მიაყენეს ეკოლოგიას, მათ შორის აშშ-ის და რუსეთის წინააღმდეგ.

პენსიონრები ევროპას დაშლიან

ევროპა ბერდება, მოხუცების თაობა კი ხმას აძლევს კონსერვატიულ პარტიებს, რომლებიც რეგიონების გამოყოფას ემხრობიან. ბელგია სამ ნაწილად დაიშლება, კატალონია და შოტლანდია დამოუკიდებლობას მოიპოვებენ. საფრანგეთის ხელისუფლებაშიც, ისევე როგორც დიდ ბრიტანეთში, სოციალისტები მივლენ. ევროპელ ახალგაზრდებში უმუშევრობა 50%-ს მიაღწევს.