The New York Times: რუსეთი 2023 წლის შემდეგ უკრაინული ქალაქის ყველაზე მასშტაბურ დაპყრობასთან ახლოსაა

რუსეთი თავის ძალებს უკრაინის აღმოსავლეთით მდებარე ქალაქ პოკროვსკისთან უყრის თავს და როგორც ჩანს, უახლოვდება ქალაქის ხელში ჩაგდებას, რომელიც ომის ყველაზე დაძაბული რეგიონის კარიბჭედ იქცა, - წერს ამერიკული გამოცემა The New York Times-ი სტატიაში სათაურით რუსეთი 2023 წლის შემდეგ უკრაინული ქალაქის ყველაზე მასშტაბურ დაპყრობასთან ახლოსაა.

სტატიაში აღნიშნულია, რომ პოკროვსკი დონეცკის რეგიონის კარიბჭეს წარმოადგენს, რომლის ხელში ჩაგდება რუსეთის პრეზიდენტს, ვლადიმირ პუტინს დიდი ხანია სურს.

ერთ წელზე მეტი ხნის ბრძოლის შემდეგ, პოკროვსკი, სარკინიგზო კვანძი დონეცკის რეგიონში, დიდწილად ნანგრევებად იქცა, მისი ომამდელი 60 000-იანი მოსახლეობა კი ახლა 1300-მდეა შემცირებული.

ქალაქის დამცველი უკრაინელი ჯარისკაცები ინტენსიური ბრძოლის შესახებ იტყობინებიან. ფრონტის ხაზის გასწვრივ მიმდინარე ყველა ბრძოლის თითქმის მესამედი პოკროვსკზე მოდის.

მიუხედავად იმისა, რომ უკრაინის ლიდერები აცხადებენ, რომ მათი ძალები ქალაქის რაიონებს იბრუნებენ, DeepState-ის - უკრაინულ სამხედროებთან კავშირში მყოფი ჯგუფი - ბრძოლის ველის რუკის თანახმად, რუსეთის ჯარებმა ბოლო რამდენიმე დღის განმავლობაში, როგორც ჩანს, პოკროვსკის სამხრეთ-დასავლეთი ნაწილი აიღეს კონტროლქვეშ.

რუკის მიხედვით, რუსულმა ჯარებმა ასევე დაიკავეს ორი ვიწრო ზოლი ქალაქის ცენტრში და მის დასავლეთ მხარეს, ხოლო პოკროვსკის დანარჩენი ნაწილი სადავო „ნაცრისფერ ზონად“ არის აღნიშნული.

„მტერი აგრძელებს ძალების დაგროვებას ქალაქში“, - განაცხადა DeepState-მა სამშაბათს და დასძინა, რომ პოკროვსკი „თანდათანობით შთაინთქმება“.

ქალაქი გახდება უკრაინაში უდიდესი, რომელიც დაეცემა 2023 წლის მაისში ბახმუტის დაკარგვის შემდეგ. იგი ითვლება ბოლო მნიშვნელოვან ბარიერად, რომელიც რუსულ ჯარებს უშლის ხელს მიუახლოვდნენ სლოვიანსკსა და კრამატორსკს - ერთადერთ დიდ ქალაქებს, რომლებიც ჯერ კიდევ უკრაინის კონტროლის ქვეშაა დონეცკის რეგიონში.

„პოკროვსკის აღებამ შესაძლოა ხელი შეუწყოს კრემლის ნარატივს, რომ რუსეთი ბრძოლის ველზე წინ მიიწევს და რომ უკრაინისთვის ომი მხოლოდ გაუარესდება, თუ ის არ დათანხმდება მოსკოვის მიერ წაყენებულ მოთხოვნებს“, - აღნიშნულია სტატიაში.

უკრაინელი ოფიციალური პირები ამტკიცებენ, რომ სპეციალური დანაყოფები ქალაქის რუსებისგან „გაწმენდას“ ახორციელებენ, ხოლო ზელენსკი სამშაბათს ახლომდებარე ჯარებს ესტუმრა და ჯილდოები გადასცა.

„გეოპოლიტიკური მესიჯების მიღმა, პოკროვსკის დაკარგვის სამხედრო მნიშვნელობა უკრაინისთვის შესაძლოა შედარებით მცირე იყოს. რუსეთის ნელი წინსვლა უზარმაზარი დანახარჯების ფასად მოდის. მიუხედავად იმისა, რომ უკრაინას სურს პოკროვსკის შენარჩუნება, სამხედრო მეთაურები ამტკიცებენ, რომ დიდი დანაკარგები, რომლებსაც ისინი კრემლის ჯარებს აყენებენ, უფრო მეტად დააზარალებს რუსეთის სამხედრო ძალისხმევას ფართო მასშტაბით“, - ნათქვამია სტატიაში.