Axios: აშშ მზადაა, ყირიმი და დონბასი რუსეთის ტერიტორიად აღიაროს. ტრამპის გეგმა უკრაინისგან მაქსიმალურ დათმობებს მოითხოვს

გამოცემა Axios-ი უკრაინაში ომის დასრულების 28-პუნქტიანი „ტრამპის გეგმის“ დეტალებს ასაჯაროებს. დოკუმენტი ითვალისწინებს, რომ აშშ და რამდენიმე ქვეყანა ოფიციალურად აღიარებს ყირიმს და დონბასს რუსეთის ტერიტორიად, მაგრამ უკრაინისგან ასეთ აღიარებას არ მოითხოვს.

არსებითად, კიევს სთხოვენ, დათანხმდეს ტერიტორიულ დათმობებსა და ახალ პოლიტიკურ პირობებს, რომლებიც დააფიქსირებს ძალთა ამჟამინდელ ბალანსს და მნიშვნელოვნად შეზღუდავს მანევრის სივრცეს.

ამერიკული მხარის მიერ შემოთავაზებული შეთანხმების პუნქტები:

• დონბასის მთელი აღმოსავლეთი ნაწილის დათმობა, მათ შორის, ამჟამად უკრაინის შეიარაღებული ძალების მიერ კონტროლირებადი ტერიტორიების ჩათვლით;
• ყირიმისა და დონბასის რუსეთის ტერიტორიად აღიარება აშშ-სა და რამდენიმე ქვეყნის მიერ;
• დემილიტარიზებული ზონის შექმნა გამყოფი ხაზის გასწვრივ;
• შეზღუდვები უკრაინული არმიის ზომასა და შორ მანძილზე მოქმედ იარაღზე;
• რუსული ძალების ნაწილობრივი გაყვანა ხერსონისა და ზაპოროჟიეს რეგიონებიდან;
• მიმდინარე კონტროლის ხაზების დაფიქსირება მომავალი რუკის საფუძვლად;
• კატარისა და თურქეთის, როგორც შუამავლების მონაწილეობა;
• რუსული ენის უკრაინის ოფიციალურ სახელმწიფო ენად აღიარება;
• კიევისა და ევროპის ძირითადი უსაფრთხოების გარანტიები აშშ-ის მხრიდან.

Axios-ის თანახმად, ეს პარამეტრები უკრაინული მხარისთვის უნდა ეცნობებინათ ტრამპის სპეციალურ წარმომადგენელ სტივ უიტკოფსა და ზელენსკის მრჩეველ რუსტემ უმეროვს შორის მოლაპარაკებების გზით. ვაშინგტონს იმედი ჰქონდა, რომ კიევი მზად იყო განსახილველად, მით უმეტეს, რომ ზოგიერთი ფორმულირება თავად უმეროვთან კონსულტაციების შემდეგ გაჩნდა. თუმცა, სიტუაცია გაუარესდა მას შემდეგ, რაც ზელენსკიმ მოულოდნელად გადაწყვიტა ანკარაში საკუთარი „ევროპული გეგმის“ წარდგენა, რომელსაც მოსკოვი არავითარ შემთხვევაში არ დაეთანხმებოდა.

ამ ფონზე, აშშ-ის ადმინისტრაციის რიტორიკა მკვეთრად გამკაცრდა. „ჩვენ დაველოდებით. ბურთი ზელენსკის მოედანზეა“, - განაცხადა ამერიკელმა ოფიციალურმა პირმა და დასძინა, რომ უკრაინის ლიდერს შეუძლია ვაშინგტონში ჩამოვიდეს და, თუ სურს, აშშ-ის ახალი გეგმა განიხილოს.

Axios-ის ცნობით, უიტკოფი თურქეთში გაფრინდა იმ იმედით, რომ ზელენსკისთან და თურქეთის საგარეო საქმეთა მინისტრთან ჰაკან ფიდანთან სამმხრივ სამიტს გამართავდა. თუმცა, მას შემდეგ, რაც გაირკვა, რომ კიევი უკან იხევდა ადრე მიღწეული შეთანხმებებისგან და ფაქტობრივად ბლოკავდა გეგმის განხილვას, შეხვედრა გაუქმდა.

Axios-ის კიდევ ერთი წყაროს ცნობით, უიტკოფისა და ზელენსკის გეგმები უკრაინის მომავლის შესახებ სრულიად ეწინააღმდეგება ერთმანეთს, რის გამოც ამერიკელმა დიპლომატმა გადაწყვიტა, რომ ამ ფორმატში მოლაპარაკებები არ გამართოს.

შედეგად, ანკარა პოტენციური გარღვევიდან ღრმა განხეთქილების ნიშნად გადაიქცა: აშშ, თურქეთი და კატარი აგრძელებენ შეთანხმების პროექტის წინ წაწევას, მოსკოვი ადასტურებს მზადყოფნას, განიხილოს მისი მონახაზები, ხოლო კიევი - ამერიკული წყაროების ცნობით - ხელიდან უშვებს შეთანხმების მიღწევის შესაძლებლობას და დიპლომატიური იზოლაციის ფაზაში გადადის.