ლიზ ტრასი: ბრიტანეთს დღეს ჰყავს პრემიერ-მინისტრი, რომელსაც საკუთარი ქვეყანა სძულს და ევროკავშირი უყვარს

დიდი ბრიტანეთის ყოფილი პრემიერ-მინისტრის ლიზ ტრასის განცხადებით, ბრიტანეთს დღეს ჰყავს პრემიერ-მინისტრი, რომელსაც საკუთარი ქვეყანა სძულს და ევროკავშირი უყვარს.

აღნიშნული განცხადება ტრასმა საკუთარი პოდკასტის მესამე ეპიზოდში გააკეთა. მან მწვავედ გააკრიტიკა ბრიტანეთისა და ევროკავშირის პოლიტიკა, რომელიც, მისი თქმით, ეკონომიკის განადგურებით არის დაკავებული და სუვერენიტეტსა და ეროვნულ იდენტობას ებრძვის.

„ბრიტანეთს ახლა ჰყავს პრემიერ-მინისტრი კირ სტარმერი, რომელსაც სძულს ბრიტანეთი და უყვარს ევროკავშირი. დღეს გვაქვს სიტუაცია, როდესაც ჩვენ ვაძლევთ მათ ფულს, და ისინი გვკარნახობენ, რა უნდა გავაკეთოთ. ევროპის უმეტეს ნაწილს დღეს მართავს ლიბერალური ელიტა, რომელიც ეკონომიკისა და საზოგადოების ნგრევის, ეკოლოგიური სათნოებისა და მასობრივი მიგრაციის იდეებით, ისლამისტებისთვის პატივის მიგებით არის შეპყრობილი. გამონაკლისს მხოლოდ ისეთი პატრიოტი ლიდერები წარმოადგენენ, როგორებიც ჯორჯია მელონი და ვიქტორ ორბანი არიან. არშემდგარი ცენტრისტული ტექნოკრატები: სტარმერი, მაკრონი ხალხში პოპულარობით ვერ სარგებლობენ, მაგრამ შეთქმულებაში არიან ბიუროკრატიასა და მეინსტრიმულ მედიასთან და დიდი ძალაუფლება აქვთ“, - თქვა ტრასმა.

დიდი ბრიტანეთის ყოფილმა პრემიერმა აშშ-ის ეროვნული უსაფრთხოების ახალ კონცეფციაზეც ისაუბრა და აღნიშნა, რომ დოკუმენტში პრეზიდენტ დონალდ ტრამპის ადმინისტრაცია მკაცრად აკრიტიკებს ევროკავშირის ქვეყნებს, თუმცა ამავდროულად მათ დახმარებას სთავაზობს.

„შეერთებულმა შტატებმა უსაფრთხოების ახალი სტრატეგია გამოაქვეყნა, რომელიც აკრიტიკებს გაეროს და ევროკავშირს. მასში უმთავრეს მოცემულობად ეროვნული სახელმწიფოა დასახელებული. დოკუმენტში ხაზგასმულია ის მთავარი გამოწვევები, რომლის წინაშეც ევროპა დგას. პოლიტიკური თავისუფლებისა და სუვერენიტეტის პრობლემა, საიმიგრაციო პოლიტიკა, თავისუფალი სიტყვისა და ოპოზიციის ჩახშობა, შობადობის მკვეთრი შემცირება და ეროვნული იდენტობის დაკარგვა. ტრამპის ადმინისტრაცია ცდილობს დაეხმაროს ყველას, ვინც ამ პრობლემის გადასაჭრელად იბრძვის. ამერიკა მოუწოდებს თავის პოლიტიკურ მოკავშირეებს ევროპაში ხელი შეუწყონ ამ სულისკვეთებას და ევროპული, პატრიოტული პარტიების გავლენების ზრდა ოპტიმიზმის საფუძველს იძლევა“, - დასძინა ტრასმა.